Meghalaya nung ILP benoktsü akhang

Shillong, Rongchii/April 23 (Ageicneis): Confederation of Meghalaya Social Organizations (CoMSO)-i state nung Inner Line Permit (ILP) benoktsü asoshi akhang tenzükogo aser Mongolbarnü parnoki ‘black flag day’ ayongzüka amung.
State sorkari state nung ILP inyakyim mebenoktetba anema iba longkak aitba sentong ya ayongzüka akar.
CoMSO kübok lokti tentet aika lir aser item lokti tentet nung züngsemtemi state yimtiba aser tanga tesem aika nung wako tanak songa iba anogo amung.
Jurila aser shishilemba dang amshiba gari tem ajak nem parnoki wako tanak agüja liasü.
Wako tanak aser banner tem nung ILP benoktsü asoshi takhangbatem zülutsür, Shillong nung Motphran tesem densema tanga tongtibang tesemtem nung asongtsü.
Hynñiewtrep Youth Council (HYC) züngsem aser tanga lokti tentet nungi züngsemtem-i ILP tangsa tang benoktsü asoshi khanga parnok süoshi nung sü tanak kaloker yimtong süa senzü.
CoMSO lenirtemi ashiba agi, state sorkari state-i ozüng alema bendanger senoka aitba nokdangtsü atema ILP benoktsü asoshi akhangba züba züba toktsüba anem ‘black flag day’ anogo ayonga among aser iba ya longkak aitba tetenzüker asütsü.
Garo Hills nunga CoMSO züngsemtemi tesem aika nung wako tanak asongja liasü. CoMSO puri, state nung ILP benoktsü atema sorkar maneni nongshitsü atema takaratiba nung tanga longkak aitba sentongtem agitsü asoshi anogo sangdongtsü.