Meghalaya nung küm shia Kalam asüba anogo amungtsü

Shillong, July 29 (Agencies): ‘Missile Man’ ta nüburtemi tenüng jalokja alisang, asür A.P.J. Abdul Kalam nem tetushi aser akümtsübu agütsüba den külemi, Meghalaya Chief Minister Mukul Sangma-i, state nung küm shia iba nüngtugu scientist sang asüba anogo bilemtetmung amungtsü, ta Bhodbar nü metetdaktsüogo.
Soso Tham auditorium nung northeast kaketshirtemi, Kalam-i inyaktetba aser pa dak aliba yimya tajungtem tarütsü putu nem metetdaktsütsü tenangzükba agiogo.
“Kalam tesüsabuba pai meimer nüburtem den northeast semdangba mapang pa tango sademba ajanga pai tangar dang nungi alia metetba sempet aser pa dak shisatsü tajung aliba den yangi aliba nüburtem sentaktepa akümer,” ta chief minister-i ashi.
“Pa tesayuba, tejangraba aser nükla temji ajaki angateta amshitsüla, balakata lanurtemi itemji angatettsüla. Asenoki pa atema inyaktsütettsü ajak agi küm shia pa asüba anogo bilemteta mungtsütsüba dang lir, anungji iba anogo nung sentong ka agia pa bilemteta amungtsü junger ta nibo bilemer,” ta Sangma-i ashi.
Sangmai, Kalam linük Tir asüba mapang March 17, 2007 nü Meghalaya semdangdang pai, state renloktsü asoshi state nung ‘special economic zone’ tenet lapokang, ta ashiba bilemteta lemsatepa liasü.
Iba sentong nung Deputy Chief Minister R.C. Laloo, chief secretary P.B.O. Warjri, IIM-Shillong director Amitabha De nungera dena liasü.