Meghalaya nung Manipur tsür nurse ka tepset

Shillong, Monupii (May) 30 (Agencies): Nazareth Hospital nung nurse ka samar bushitepa aruba sülen yashi Shillong nung la tasümang anguba sülen Meghalaya ajungalen nisungtemi ola adoker aser la atema temeten meshitsür.
Arishi küm 28 tain Leiyaton Soro indang mangji Umiam lake anasa Ryndang Briew nung angu. La ya Manipur tsür lir aser Nazareth hospital nung nurse inyaka liasü. La ya taoba Küptoknü (Honibar) nungi samar bushitepa aru.
Soro den la tenu ka Laitumukhrah nung taa agüja aliba ki ka nung liyonga aru aser la samaba sülen tenu jagi bushidanger tatem nung police nem osang sangoktsü.
Sangtennü (Mongulbar) police-i Soro indang IMEI number ajanga la indang mangji bushitet.
Police-i Arrla 302 kübok nisung tepsetba ken o ka benokogo aser la indang mang Shillong Civil Hospital nung post mortem asütsü atema bener ogo.
Thangkhul Elders Forum Shillong-i iba tatalokba khukhua aitsüogo aser tekaratiba nung bushisüngdang asütsü takhangba agütsü.
Thangkul Student Union tir, Ngaranmi Marei aser kaketshir Wungreiyon Moinao natia Soro tepsetba atema aoksar aser Meghalaya nung tetsürtem anema mapa inyakba atema tebilemtsü abener ta ashi.
CSWO tir Agnes Kharshiing-i iba tatalokba khukhua aitsür ta ashi aser police dang Soro tepsetetertem aputsü atema takhangba agütsü.
“Iba ama tatalokba mapang shia ataloker. Police Department aser State Women’s Commission-i iba ken o süoki ia bushisüngdang asütsüla. Tasülaji asen state (Meghalaya) nungi masü saka sorkari bangdak ketdangsertem dang tajungtiba nung bushisüngdang asütsü atema tetuyuba agütsütsüla. Yamaji inyak nung dang asenoki North East nung asenok den kidanger state tem den tesentaktep tajung yutettsü” ta National Youth Awardee & FKJGP Central Body Education Secretary, Kitboklang Nongphlang-i ashi.