Meghalaya nung marriage certificate nüngdaktsü

Shillong, Luroi (August) 29 (Agencies): Meghalaya sorkari apuanitem dang official mapa ajak nung marriage certificates bener arutsü atema tetuyuba agütsüogo.
Mongulbarnü Excise, Registration, Taxation & Stamps Department nung under secretary-i Maitshaphrang nung convenor nem iba tetuyuba agütsü.
Meghalaya nung kinungbo maliba tetsütem aika akümer aser kinungbotemi senotsü teyari magütsüi kibongtem senzüka toktsür aser iba ajanga tanur aika school züngtor anener aser ozüng alema mapa inyaker ta Maitshaphrang nung convener, Michael N Syiem-i memorandum ka zülu.
Syiem-i Chief Minister Conrad Sangma dang department ajaki marriage registration certificate ajak nung amshitsü atema inyakyim ka tenzüktsü atema ozüng ka yangluang ta ayongzüka liasü.
Paisa Chief Minister Conrad dang Meghalaya Compulsory Registration of Marriage Act, 2012 mapa küma inyaktsü mepishi.