Meghalaya nung MLA talangtiba tenzüksang süogo

Shillong, September 26 (Agencies): Meghalaya nung MLA tambutisang aser mapang talangtiba tenzüksang, Hoping Stone Lyngdoh tanü Honibar nü Shillong nung aliba mozüki ka nung süogo, ta par kinüngertemi osang ka ajanga ashi.
Arishi küm 86 Hoping kija-i state nung Uranium mining anema rara liasü.
Hoping ya West Khasi Hills, Nongstoin constituency nungisa toktepa aruogo aser pa Northeast Indira Gandhi Regional Institute of Medical & Health Sciences nung teyari tagidak lia tanep züngia 1:00 ako meta alima nungi pilaogo, ta parnoki ashi.
Teku nung timtem kar adoka taoba Deobar nü pa mozü kidangi anir ao,saka iba sülen tanga timtema adok.
Osangbenertem den jembidang NEIGRIHMS Medical Superintendent, Dr A Phukan-i, pa pneumonia aser septicemia den temang nung telen aika mapa meinyaki asü, ta ashi.
Iba osang angashia Chief Minister Mukul Sangma, Speaker AT Mondal aser Opposition Lenir Donkupar Roy nungeri asüko osang lemsatepogo.
Hill State Peoples Democratic Party (HSPDP) Tir, Stone lenisüba nungsa Khasi-Jaintia kintem asoshi state jenjang khanga aruogo.