Meghalaya nung nakmati atur mang ka agitet

Shillong, January 24 (Agencies): East Jaintia Hills kübok Ksan yimtsüng nung nakmati aturtem samar hopta trok shi bushitepa arur tanü Indian Navy-i tasümang ka agitetogo.
Iba mang ya taoba hopta angu saka Navy-i agitettsü merangdang, mang petsaa aoba ajanga tanaben telungi ai.
“Onoki mangji nguogo aser kanga mejungi shizüka ogo” ta National Disaster Response Force nung ketdangser Santosh Kumar Singh-i ashi.
Nakmati atudak feet 100 shi telungi ir nungi mangji agitet ta osang ajanga ashi.
Navy tzüwartemi Remotely Operated Vehicle (ROV) ka amshia taoba Bodbar nü mangji mezüng angu. District administration-i tuyuba nung ajemdaker Brihostibar nungi parnoki mangji agitettsü atema mapa tenzük.
Tesüiba ghonda 24 tsüngda Coal India Ltd, Odhisa Fire Service aser Kirloskar Brothers Ltd teloktemi tzü lakh litre 81 dak tema atsüdokogo.
Nakmati atur nisung 15 ya December 13, 2018 nungi samar bushiteper aser state sorkari parnok kibongtem nem sen lakh ka ka teyari agüja atatsü atema osang metetdaktsüogo.
Parnok bushiba maparen ya Supreme Court-i hopta shia osang agia arudar. Taruba Hombarnü SC nung iba osang metetpelatsü.