Meghalaya nung nakmati atur mang tanabuba agitet

Shillong, February 27 (Agencies): Indian Navy aser National Disaster Response Force (NDRF) külem telok kati Bodbarnü East Jaintia Hills district nung mang tanabuba agitetogo.
December 13, 2018 nü iba tesem nung nisung 15 tashi nakmati atudak nungi madokteti tzü agi metsüngbanga liasü.
“Indian Navy indang underwater remotely operated vehicle (UROV) ka ajanga shizüka orr aliba mangji tzüi atsütet aser container ka nung enoker temai agitet” ta ketdangser kati ashi.
Indian Navy diver temi January 23 nü mezüngbuba mang agiteta liasü aser paji Assam kübok Chirang district nungi Amir Hussain liasü ta jangjaogo.
Mangji Meghalaya Police ket nung agütsüogo aser post mortem atema Khliehriat hospital-i bener ogo, ta ketdangserisa ashi.
National Green Tribunal-i Megahalaya nung April 17, 2014 nungi rat-hole coal mining tenokdangba agüja liaka iba mapa ozüng alema inyaka arur.
Supreme Court-i rescue operations ketdangsüa repranger aser parnoki sorkar dang nakmati aturtem ‘tasü’ mesüra ‘taküm’ agitettsüla ta tetuyuba agüja lir.