Meghalaya nung PM Modi-i Khasi sobaliba asem atem

Mawphlang (Meghalaya), May 28 (Agencies): Honibarnü Ato kilonser, Narendra Modi-i Meghalaya nung Khasi Heritage yim, Mawphlang semdanga Khasi-Jaintia kin sobaliba angazükba den külemi Khasi nunger sobaliba asem atem.
Mawphlang yim semdangtsü lia Modi-i tamasa sacred groves anasa aliba Elephant Falls semdang. Elephant Falls ya Shillong nung raliwalirtemi kanga sapua semdangba tongtibang tesem rongnung ka lir.
Mawphlang yim ya state yimtiba,  Shillong nungi kilometer 25 shi pilar East Khasi Hills district nung lir.
Ato kilonser kati mezüng Khasi Heritage yim semdangbaji Modi lir. Iba mapang nung pai tribal Khasi aser Jaintia sobaliba sobutsü sobur aliba lanur tetsür aser teburtem den jembi.
Modi-ia kongki kar temdanga liasü aser tebur ka dangbo tsüngsangba den liromedema sobaliba asem atemtsü pa dang sayuang ta ashi.
Osangbenertem den jembidang Mawphlang yim nung alir ka tenüng agi, Sarah Wankhar-i, “Ato kilonseri ozü yim nung tetsüng ajemokbaji jangratemtsüka. Pai ozü sobaliba aser Ka bom (sobaliba asem) angazüknüa liasü,” ta ashi.
Kanga nüma tanga Wankhar-isa, “Ozü yim nung tzü tajemtsü aser merükmeju jenjang  asadangtsü atema tamalen pai (Modi) par minister ka (Ram Kripal Yadav) ozü yimtsüngi yoka liasü, aser tanübo pa yangi lir,” ta ashi.
Hima Mawphlang nung sobaliba tongti, N.K. Lyngdoh-ia, “Ato kilonseri ozü yim mapang tatsüka atema semdangbaji ozü nüburtemi kodanga mamatoktsü,” ta ashi.
65buba North Eastern Council (NEC) Plenary senden nung jembitsü atema Modi Hokolbarnü Meghalaya-i arua liasü. Iba senden nung NE state tem nungi Angh tem aser Chief minister tem aden.

You must be logged in to post a comment Login