Meghalaya nung prangpong-injang shibelener 4 apu

Shillong, November 18 (TYO) : Meghalaya kübok West Garo Hills district nung police-i prangpong injang shibelener nisung pezü apu.
Parnok ya Tura jila kübok Chandmari tesem nung apu aser parnok rongnung NSCN züngsem ka dena lir aser tanüngba asemji Garo National Liberation Army (GNLA) den tesentaktep alirtem lir.
Item telok ya Nagaland nung Dimapur-i prangpong-injang abeni aotsü atema lia apu. Parnokji Nobin D Sangma, Peirai Hao, Livingstone Ch Marak aser Balgranj R Marak nungertem lir, ta police-i metetdaktsü.
Parnok ket nungi AK injang round 12, GNLA demand note ka aser sen 1,50,000 ngutet.
Peirai Hao ya NSCN (K) züngsem lir aser pa ya tawa tuang Tura jail nungi bail nung chiokba lir, ta police-isa ashi.
NSCN teloktem nungi GNLA atema prangpong-injang shibelenertem rongnung Peirai-i tongti shilem agi. Pa kinungtsü aser tangartem anir pai Nagaland-i ao aser idak nungjagi prangpong-injang miimba bener aru. Anogo asem tejaklen pai Dimapur nungi AK rifle 3 bener aruba nangzükogo, ta police-isa metetdaktsü.
Nobin-isa ashiba agi, pai teti par kibong anir senzü. Pa Dimapur-i aodang kinüngertem anir ao aser police-i kodanga parnok mita mereprang.
Dimapur nung Naga nunger telungpur telok aikati prangpong-injangtem ayoker aser nisung shitak denjira rocket launchers dena alitsü angur, ta Nobin-isa police dang ashiba osang metetdaktsü.