Meghalaya nung Pullela Gopichand-i badminton asayadak tendangtsü

Guwahati, January 8 (Agencies) : Shillong nungi Guwahati-i badminton asaya belenba sülen Meghalaya-i Assam den külemi 12 buba South Asia Games (SAG) ayongzüka amungtsü aliba khen bilemdangtsü ta ashiba sülen, Sports Authority of India (SAI)-i national badminton coach Pullela Gopichand nem stadium reprangshimtsü atema mapa lemzüktsü.
Shitakba agibo taoba Honibarnü Gopichand Shillong tonga arutsüba liasü saka New Delhi nung tzüsü timtem ajanga pa tayimtsü thinentsüsa aküm aser pa January 13 nüa tonga arutsü, ta Meghalaya State Olympic Association working president John F Kharshiing-i osangbener dang ashi.
“Gopichand-i telemtetba agibaji kanga tongtipang asütsü saka onoki iba ashishitep ken o tembangdaktsünür. Onoki South Asia Games (SAG) nung shilem aginür” ta Kharshiing-isa shisem.
Shillong nungi badminton asaya belenba mapa anema Meghalaya chief minister Mukul Sangma-i kanga meranga inyaker. State sports secretary-isa IOA aser SAI dang iba khuret atema shidi ka züluogo.
Taoba Mongulbarnü F Kharshiing-i SAI Injeti Srinivas, CEO, 12th SAG 2016, Shillong, IOA president N Ramachandran, IOA secretary general Rajeev Mehta aser IOA joint secretary Rakesh Gupta nunger dangi shidi yok.
Union minister of state for sports and youth welfare Sarbananda Sonowal-ia iba khuret nung yariteptsü aser Meghalaya nunger taginüba akhümtsübutsü, ta Sonowal-i metetdaktsüogo.