Meghalaya nung Sweepers’ Lane indang report sorkar nem agütsüogo

Shillong, Luroi (August) 17 (Agencies): Shillong kübok Sweepers’ Lane indang ken o atema magisterial inquiry report Meghalaya sorkar nem agütsüogo.
Bushisüngdangba report ji magistrate-i East Khasi Hills Deputy Commissioner P S Dkhar nem agütsü aser pai ibaji sorkar dangi aben.
Tang iba ken o ya sorkari reprangtsü aser high level committee-i tatembang telemtetba agitsü ta Deputy Commissioner Phkar-i ashi.
Shillong nung aliba Sweepers’ Lane nung lendong atalokba aser ozüng alema inyaktsüsa olulu prokshirtem jangjatsü atema I Majaw lenisüba kübok magisterial inquiry agi.
Magisterial inquiry dak alia police-ia bushisüngdang balaka südar.
Maneni, Commission for Minorities aser National Human Rights Commission teloktemia iba tatalokba atema mapa inyakdar.