Meghalaya nung tiyazü Nipah virus osang prokshi

Shillong, Monupii (May) 29 (Agencies): East Garo Hills district nung mejangjatetba tashidak ka ajanga nisungtem shiranger aser parnok Williamnagar Civil Hospital nung anepaludar ta tiyazü osang ka prokshiba atema temerenshi agüjang ta Meghalaya Health Department-i takhangba agütsü.
Kerala nung Nipah virus ajanga nisungtem asüba sülen iba tiyazü osang prokshiba nübortem kanga aoksadaktsür ta Department-isa ashi.
Integrated Disease Surveillance Programme (IDSP) atema State Surveillance Officer, Dr L M Pdah-i ashiba agi, WhatsApp nung litchi achiba sülen nisung aika shiranger ta asüba osangji tiyazü.
Williamnagar Civil Hospital nung Medical Superintendent (MS), Dr J Marak den Dr Pdah-i osang agitep aser idangji Dr J Marak-i tiyazü osang ka lir aser Williamnagar Civil Hospital mesüra Williamnagar nung Dr Basonti R Sangma ta ser doctor shinga mali ta kuli agütsü.
“Iba tiyazü osang ajanga nübortem tsübudaktsür ta MS-i ashi. Iba ya cyber crime kübok aitsü aser olulu prokshirtemji ozüng tapet agi merenshitsüla ta paisa shiogo” ta Dr Pdah-i ashi.
Meghalaya nung Nipah virus agi shirangba ka danga puteta mali saka district medical aser health officer tem dang IDSP kübok rapid response teams (RRTs) tashi itshitsü tetuyubabo agütsüogo, ta Dr Pdah-isa metetdaktsü.