Meghalaya nung UDP-BJP-i Congress atsüngdoktsüa akok

Shillong,  May 19 (Agencies): Tura by election nung BJP-i yaria NPP-i takok anguba sülen UDP-i 2018 Meghalaya assembly election atema BJP den lokteptsü atema tebilemba lir.
UDP working president, Jemino Mawthoh-i, “Tang BJP temai adokdar aser parnok kongsang state ajaklen prokshidar, aser ibaji yangi-a (Meghalaya) merangdar, aser onoki state nung Congress sorkar atsüngdoktetra national party (BJP) den lokteptsüa akok,” ta metetdaktsü.
“Party-i teloktepji election magidang mesüra election agir sülen lokteptsü’ar shisangdangtsü,” ta paisa ashi.
UDP den teloktep, NPP candidate-i election nung takok anguba sülen tang Meghalaya nung regional party-i BJK den loktepnüba olen jembiogo.
Tanep Conrad adianu aser NPP MLA, James K Sangma-ia, taruba assembly election nung party-i BJP den amalitepa inyaktsü, ta sangdonga liasü.
Meghalaya nung Congress sorkar atsüngdoktsü nükjidong nung UDP-ia BJP den loktepner.
“State nung tang atalokba aser state yimsüsüba tensa shisadangra, state rongsenkettsüng jenjang ajanga nübur aika mepelar, nüburtemi temelenshi ka yongyar, parnoki tanga lenmang ka bushir,” ta Mawthoh-isa ashi.
Ano külen HSPDP lenir, Ardent Miller Basaiawmoit-i Conrad-i vote aika agi takok anguba atema pa nem tenüngsang agütsüba den külemi, meimlai aliba state Assam nung BJP-i takok angubaji ajanga nüburtemi temelenshi ka yongyaba kuli sayur, ta ashi.