Meghalaya nung Uranium atutsü anema KSU-i nokdaker

Shillong, April 05 (Agencies): Meghalaya nung Khasi Students’ Union (KSU)-i Centre aser state sorkar dang Uranium Corporation of India Limited (UCIL) nem state nung ‘uranium’ tudaktsütsü asoshi nüburtem mesüzüktsü temerang, ta ashi.
Kaketshir lokti ajanga state nung ‘uranium’ atutsü anema küm 30 shi nokdaker, aser Uranium Corporation of India Limited (UCIL) aser Atomic Minerals Directorate (AMD) ji Meghalaya nung Hynniewtrep ji nüburtem atema tsükchir tulutiba lir, ta metetdaktsü.
Tanükertem kanga akanga nokdaka liaka longkak aitertemi AMD office atongba sülen senden ka agi. Iba sülen KSU pusemertemi AMD aser Uranium Corporation of India Limited (UCIL) indang noksa ana rongtoktsü. UCIL ya department of atomic energy kübok sorkar company ka lir. Iba company ya ‘uranium’ ‘mine’ aser ‘process’ asüba nung sendaka lir.
“Ketdangsertemi uranium atutsüba anema kanga sashia nokdaker ta meteta liaka, parnoki nüburtem mesüzüktsü asoshi kanga meranger, anungji iba ken o dak sendakba nung mepetmesü adokra Centre, state sorkar, UCIL aser AMD-i iba khuretji abentsü,” ta KSU tir Lambokstarwell Marngar-i lokti den jembidang ashi.
KSU pusemertemi maneni atomic minerals directorate (AMD) office-i oa Central sorkari South West Khasi Hills nung uranium atutsü asoshi sentong yangluba anema sashi sashia nokdakba metetdaktsü.
UCIL-i uranium atutsü merangba anema jembidang, taoba KSU tir Daniel Khyriem-i ashiba agi, parnoki tashiyim agi uranium atutsü merangra, onoki AMD aser UCIL office amaktsü aser parnok idak nungijagi aridoktsü.
North East Students’ Organisation (NESO) mendenbuba Samuel B Jyrwa-i ashiba agi, UCIL-i uranium atutsü meranger küm 27 jungogo. Pai maneni Hill State People’s Democratic Party legislator Hoping Stone Lyngdoh-i anir iba anema longkak aitba bilemteta jembi.
“Onoki iba mapang sülen longkak aitba sentong agia mali, aser tang kechi ataloktsüar memetet. Parnoki nüburtem mesüzüktsü asoshi tasa aika amshiogo, saka uranium indang ken o ya joko tesüiba ken o ka ta parnoki shisatettsüla ,” ta Jyrwa-i ashi.
Noksatem rongdokba sülen iba tesem kasa nung longkak aitba sentong tembang. Yimtong süa senzüba mapang aser noksatem rongdokba mapang long agi aonba aser yamala tatalokba kar atalokba osang ajangasa metetdaktsü.