Meghalaya nunger 1,200-i Aadhaar enrollment agienner

Shillong, November 05 (Agencies): Meghalaya nung Aadhaar tenüng züluoka alir nisung 1,000 dak temai biometric scheme nungi tenüng agientsü atema mepishiogo.
Parnoki ashiba agi, Aadhar enrolment magi nungbo parnok senso nungi agientsü aser temeten malitsü ta yazü shia parnok tenüng züluokdaktsü.
Meghalaya Peoples Committee on Aadhaar (MPCA) nungi PBM Basaiawmoit-i, “Biometric scheme (Aadhar) nungi tenüng agientsü atema nisung 1, 202-i documents nung sign süogo. Parnokji centre asem – Shillong, Mawkyrwat South West Khasi Hills aser Nongstoin, West Khasi Hills districts nungi lir,” ta metetdaktsü.
MPCA, ya kaketshirtem aser lokti tentet balala adenba tongti tentet ka lir, aser parnoki züngya 12 aketba unique identification number anema “opt out of Aadhaar” campaign tenzükogo.
Khasi Student’s Union-ibo 2014 küm nungi tenzüka Aadhar anema ola adoker. Parnoki ashiba agi, Aadhar ya ajanga ozüng alema arua alirtemi parnokji Meghalaya nung alitsü temeten atema nokdaktsü.
MPCA-i Aadhar agientsü atema shidi agütsütsü asoshi November 10, 2017 tashi mapang lapokja lir, aser iba sülen ibaji sorkar agency, Unique Identification Authority of India (UIDAI) nem agütsütsü, ta paisa metetdaktsü.
Meghalaya Chief Minister, Mukul Sangma-a tang tashi Aadhar enrolment magi aser pai ashiba agi, biometric scheme atema nüburtem kanga rongshiba ajanga sensotem ratamatadaktsür.
“Ni-a Aadhaar tenüng mezülok aser nija ka mim osangtem temetenji kanga tongtibang, aser iba atema ni tebilemtsü akar, ajimesüra democracy inyakyim raksatsü,” ta Chief Minister-i ashi.
Tamalen Supreme Court-i sorkar aser sorkar agency tem dang social welfare schemes ajak atema Aadhar nüngdakba ozüng mamshitsü atema aiben tuyua lir, ajisüaka Reserve Bank of India (RBI)-i bank account aser Aadhar number sendakteptsüla ta tuyuogo.
Meghalaya nung opposition party, Hill State People’s Democratic Party (HSPDP)-ia, Aadhaar aser bank accounts sendaktsüteptsü atema tuyuba asoshi parnoki RBI nem legal notice agütsütsü, ta sangdongogo.