Meghalaya nungi Daniel Syiem-i London nung pa ‘design’ sayutsü

Meghalaya, March 11 (Agencies) : Daniel Syiem meyong Ethnic Fashion House ajanga High Commission of India, Cultural Wing, The Nehru Centre, London nung Northeast Indian craft, culture & music anogo pezünü sayutsü.
India nunger Designer kati iba ama international sabang tulu nung pa sempet sayutsübaji tan ya mezüng asütsü.
Iba sentong nung Meghalaya tsür indang sobaliba sobutsüa sayutsü. Iba sü ya Meghalaya lisotsürtemi teka agi atakba lir. Iba sü ya joko putu aika amshia arur ajisüaka majener aser tajungba küma iba sü nung aliba sentsütemjia tzü mopung den kanga tapet lir.
Daniel Syiem meyong Ethnic Fashion House ajanga iba sentsü balala wazüka aser kümzüka ayuba tsütsü kanga meranga inyaker aser tali tajungba küma renlokdaktsüba pai alima dang kanga junga rateta metetdaktsür.
Kasa sentong nung Northeast tesem nungi Khasi, Jaintia, Naga aser Mizo kintem indang sentsü tapu balala aketba subosolemtsüa sayutsü.
Iba sentong nung Fashion show ka, Audio-Visual sentong ka aser lokti olemtep sentong ka akatsü.
Fashion House team-i parnok den Ri Bhoi district nungi sütaker-a ka anir aoer aser iba sentong nung lai ajangshiba aser teka mapa inyakyim rasaa ashitsü.
Iba inyakyim ajanga sütakertem tali ajungmesotsü. Iba sentong nung sobaliba sentong-a ka akatsü aser indangji Assam, Meghalaya, Manipur aser Mizoram nungi Bihu tsüngsang sayutsü.
Iba sentong indang osang abentsü asoshi Northeast nungi Eastern Chronicle aser International nungi Vous!Magazine, London alitsü.
Iba sentong nung yarisemba temaitsü Meghalaya sorkari sütakla oli aruli atema sen ajunga agütsütsü.
Ambassador/Permanent Representative, Permanent Mission of India, Ajit Kumar-i parnok telok ya London nung sentong temli March 22, 2016 nü United Nations Offices nung World Intellectual Property Organization (WIPO), United Nations, Geneva, Switzerland sentong nunga kasa shilem agitsü asoshi jaoka lir.
Anungji Daniel Syiem meyong Ethnic Fashion House-i London aser Geneva naprong nung Northeast India sobaliba aser music ajanga nüburtem ajungmesotsü sentong lir.