Meghalaya nungi tetsür ka tasümang angu

Shillong, Metsüremi 28 (Agencies): Tentonü anepdang Delhi kübok Munirka nung Meghalaya nungi arishi küm 23 tetsür ka lar kidang tepseter lia angu, ta police-i metetdaktsü.
La indang Aadhaar card ajanga la maitsüji jangjaogo, ta police-i ashi.
Anepdang 9:00 ako meta tetsür ka tasümang nguogo ta police dangi osang arua liasü, iba sülen police tonga aodang kiji temalen nungi shibanger liasü; kishiji kakpoker ai nung tetsür ka tasümang angu aser tasümang anasa tabenba sü-a liasü, ta parnoki ashi.
Deputy Commissioner of Police (South-West) Milind Dumbere-i, “Ita ka tejaklen tetsür laji Gurugram nung aliba call centre ka nung inyak tenzük, aser la Munirka nung aliba para kidang telidak liasü. Iba tatalokba osangji lar kinüngertem nem metetdaktsüogo. Tasümangji post-mortem atema bener ogo,” ta metetdaktsü.
Police ketdangserisa, “Tasümangji anogo pongu shi asütsü ama repranger. Onoki la indang phone call records aser iba tesem nung CCTV noksa reprangdangdar,” ta metetdaktsü.
Vasant Vihar police station nung nisung tepsetba ken o ka benokogo, aser maneni bushisüngdangdar,” ta police-isa shisem.