Meghalaya People’s Committee-i Aadhaar Enrolment Drive anemer

Shillong, May 17 (Agencies): Meghalaya People’s Committee-i Bodhbarnü state sorkar dang ‘Aadhaar enrolment drive’ anendaktsütsü asoshi aser yamala maparen tangsa tang agintsü asoshi akhang.
Aadhaar enrolment maparen iba ita East Khasi Hills district nung tenzüktsüba osang angazükba sülen parnoki Chief Minister Mukul Sangma dangi shidi ka zülu. welfare scheme balala angutsü asoshi Aadhaar card ya “mandatory” masü ta Supreme Court-i ozüng ka agüja aliba parnoki CM nem lepshia metetdaktsü.
“Yaküm 1955 Citizenship Act yanglushiba sülen lisopur dak sendakba nung ken o adokba den külemi Aadhaar enrolment ken o ajanga chichiba India lisopurtem nem tekümzükba agütsütsü melena lokti jenjang anokshitsüogo aser iba ajanga nüburtem tetsübu nung temzüng ozüng dak sendakba nung tebilemtsü aika adok daktsüogo,” ta iba lokti nung züngsem Rev. P.B.M. Basaiawmoit-i shidi nung zülutsü.
Mr Basaiawmoit-i ashiba agi, Aadhaar enrolment dak sendakba nung nüburtem dak tetsübu ka lir aser iba ya Deobarnü tashi nung state nung nütsüng lakh 30 dak tema aliba nungi Meghalaya nung alir parnok 2,78,906; shilem 9-i dang züngoksema aliba ajanga sayur.
“Tasa balala adonga state nung aliba nüburtem Aadhaar nung züngoksemdaktsütsü merangbaji tai lir,” ta paisa ashi. Maneni Basaiawmoit-i ashiba agi, Assam aser Jammu & Kashmir den külemi Meghalaya-a maparen balala atema Aadhaar number agütsütsü nungi jenbua lir aser iba osang ya ajaknem metetdaktsütsü nüngdaker. Committee-i maneni Aadhaar enrolment magi tsüngda lokti nem iba maparen metetdaktsüba sentong ka agitsü akhang.