Meghalaya police-i taila company nungi jenbua alitsü metetdaktsür

Shillong, December 2 (Agencies) : Meghalaya police-i Bodbarnü nübortem dang taila company nungi jenbua alitsü osang metetdaktsüogo.

Item taila company temi parnok indang website nung Prime Minister indang noksa amshir ta Superintendent of Police (City) Vivek Syiem-i ashi.

(NAACS Ltd) ta ser taila company kati parnok corporate address ji “Udham Singh Nagar, Dehradun, Uttarakhand” nung lir ta shia mapa 7000 den timba tazüng aliba osang metetdaktsüogo. Parnoki North East lanurtem dak tenük yoka iba advertisement agütsü, ta Superintendent of Police (City)-isa ashi.

Syiem-isa ashiba agi, “iba company ya Public Sector Undertaking Act, Government of India kübok register süa lir ta kuli agütsür, saka India ozüng nung ibala Act kecha yanglua mali, aser parnok agütsüba address nung corporate office jia mali.”

Company-isa gazette notifications kar adokogo saka itemji mali aser parnoki overseas office aika lapoka lir ta kuli agütsür. Company-i parnok indang website nung India Prime Minister indang noksatem enoka lir. Ibala taila company nungi public jenbua alitsü metetdaktsür, ta Syiem-isa ashi.