Meghalaya, Ri-Bhoi district nung Congress office den gari asem rongdoktsü

Shillong, June 02 (Agencies): Meghalaya nung kaketshir lenir pongu apuba sülen anogo ishika lir Ri-Bhio district nung mejangjaba nisung kari Congress office ka den gari asem rongdoktsü, ta Hokolbarnü police-i metetdaktsü.
Yashi anepongi Congress office raksatsü aser office indang tongti kishi rongdoktsü.
Yasüng iba district kübok Nongmynsong aser Umiam Lake tesem na nung petrol bomb amshia osangkaket abenba gari ka, police requisition bus ka aser tanga gari ka rongdoktsü, ta parnokisa ashi.
Ri-Bhoi district ketdangsertemi section 144 CrPC kübok nisung pongu dak tali madenshitsü atema ozüng benoka lir. Ano state yimtiba, Shillong nungsa sepai tali meshisema sorkar kiojentem nükdakja security akangshiogo.
Ri-Bhoi district nung railway project anema taoba ita railway construction ka amakba dak sendakba nung Khasi Students Union lenir pongu pua lir.
Railway yangluba ajanga bendangertem ozüng alema state telungi aita alitsü, ta bilemba kaketshir tenteti railway project ya anema nokdaker.