Meghalaya sorkari Community Colleges 9 lapoktsü

Shillong, December 22 (Agencies): Meghalaya sorkari community college 9 lapoktsü atema sen crore 50 lemzüktsütsü. Item college ajanga yimtsüng jenjang nungi kaketshirtem higher education angutsü maongka agütsütsü.
Cabinet senden ka amenba sülen osangbener den jembidang Chief Minister Mukul Sangma-i “college tem atema khen atema capital expenditure sen crore 50 agütsütsü aser iba sülen sen crore 53.11 shi indoktsü” ta ashi.
Community college indang telemsa ana lir- Ground Field (lapoka aliba college tem sen crore 2 angutsü) aser Green Field (college tasen shia nem sen crore 10 agütsütsü).
Mezüngbuba telemsa nung Nongstoin College, Tirot Sing Memorial College, Ri Bhoi College, Shangpung College aser Jaintia Eastern College, Khliehriat tem adener.
Green field category kübok community college tasentemji Tura, Ampati, Chokpot aser Rongjeng nung lir, aser college tem nung science, commerce aser arts streams alitsü, ta Mukul-isa metetdaktsü.
College tasentem lapokba ya state yimtiba nung khuret ajema akümtsü atema lir. Community college tem lapokba ajanga higher education züngnüba kaketshirtem menden peria angutsü, ta paisa ashi.
Yimtsüng jenjang nung alirtemi parnok alidak college ka akatsü atema iba ya model tajungtem rongnung ka lir, ta Chief minister-isa shisem.