Meghalaya sorkari formalin ango bushitsü tuyur

Shillong, Luroi (August) 3 (Agencies): Meghalaya sorkari ketdangsertem dang formalin enokba ango bener aruba tesemtem metettsü atema tetuyuba agütsü.
“Onoki anogo 15 atema ango bener marutsü tenokdangba agütsüogo. Formalin aliba ango bener aruba tesem metettsüla” ta yashi Meghalaya Fisheries Minister Comingone Ymbon-i ashi.
Andhra Pradesh ama state nungi ango bener arurtemibo formalin enokba ango bener maru ta ashir, ta Fisheries Minister-isa ashi.
Taoba mapang Assam nung laboratory ka nung tendangtsü atema ango 19 bener yokba nungi formalin aketba ango ana angu.
Meghalaya sorkari July 23 nungi anogo 15 tashi state telungi ango bener marutsü atema tenokdangba agütsü. Iba tenokdangbaji August 6, 2018 nü tembangtsü.
Sorkari local ango ayoktsü atema ayongzüker aser nisung kari local ango ayokba mesüra aliba noktangtsü merangra sorkar dang shiang, ta Minister Ymbon-isa metetdaktsü.
Meghalaya-i Andhra Pradesh ama state tem nungi küm shia ango metric tonnes 21,000 shi bener aru aser state-i metric tones 12,000 shi dang agütsütet, ta paisa shisem.
Aquaculture mission kübok ango tzübo 25,000 tashi yanglutsüba liasü saka tzübo 17,000 dang yanglutet. Tanüngba ango tzübu 7,000 ji bank tem nungi loan clearance mengutet, ta Ymbon-isa ashi.
Ango tzübu lapoknür shia nem state sorkari subsidy 60%, beneficiary-i 15% aser bank-i 25% agütsü.
Taoba küm pungu tsüngda aquaculture mission kübok lapokba ango tzübutem nungi küm nung ango metric tonnes 8,000 shi dang mesütet.