Meghalaya sorkari mulunga nakmati tudaktsü: Citizens’ Report

Shillong, January 14 (Agencies): Nakmati aturtemi ozüng alema nakmati atutsü aser belentsü atema Meghalaya sorkari mulunga mapa inyakdaktsü aser nakmati aturtem yari ta citizens’ report ka nung shia lir.
Activist 22-i renemba Citizens’ Report ji January 7, 2019 nü Supreme Court nem agütsü.
Meghalaya sorkari National Green Tribunal aser Supreme Court tetuyubatema alema iba mapa inyak, ta parnoki ashi.
Yaküm December ita tetenzüklen Supreme Court nem agütsüba mezüng report nung yimsüsür 12 shi ka mesüra parnok kinungertem meyong nakmati atuba tesemtem lir ta metetdaktsü.
Meghalaya kübok East Jaintia Hills district nung yaküm December 13 nü nakmati atur 15 tashi nakmati atudak nungi madoktettsüsa lendong ajuruba sülen Citizens’ Report indang tanabuba shilemji agütsüogo.
2014 nung sorkari nakmati atuba noktanga liasü saka October 8, 2014 nungi December 5, 2018 tashi nung nakmati tutetbaji menokdangdang tutetba dang nungi teimba liasü, ta Citizens’ Report nungsa shia lir.