Meghalaya sorkari SSA tesayur nem itasen agütsütsü

Shiillong, Luroi (August) 19 (Agencies): Meghalaya nung Sarva Shiksha Abhiyan (SSA)-i teyari agüja lapokba school tem nung tesayur nem ita pezü indang itasen magütsüi aliba agütsütsü.
Meghalaya sorkari nangzükba sülen All Meghalaya Sarva Shiksha Abhiyan School Teachers Association (AMSSATA)-i lungkak aittsü sentong atongba thinena atatsü lemtetogo.
Meghalaya nung SSA-sponsored schools nung tesayur 12,481 lir.
Chief Minister Conrad K Sangma den senden amendang Central government’s Project Approval Board (PAB-i menuba ajanga sorkari itasen magütsüter aser ita pezü indang itasen agütsütsü telemtetba agiogo ta onok dang ashi, ta AMSSASTA President, L. Marngar-i ashi.
Luroi (August) 20 tashi nung state sorkari itasen magütsür tesayurtemi district balala nung menden lungkak aitba sentong agitsü ta metetdakja liasü.
Meghalaya Chief Minister-isa tesayur telok dang lungkak aitba sentong magitsü mepishi aser sorkari akokba tashi itasen magütsüi aliba agütsütsü ta nangzüka liasü.
SSA upper primary school tesayurtem indang itasen sen 20,493 nung 20,000 ajemba den SSA lower primary tesayurtem sen 19,000 nungi 15,000 onüktem SSA State Project Director den lemsatepogo, ta Marngar-isa ashi.
All Meghalaya Sarva Shiksha Abhiyan School Teachers Association (AMSSATA)-isa SSA tesayurtem nem ita shia itasen agütsütsüla ta takhangba agütsü.