Meghalaya telungpuri NE state indang SIM amshir

Shillong, November 10 (Agencies): Meghalaya nung aliba telungpurtemi Nagaland, Manipur aser Tripura state tem indang SIM card amshir aser ibaji ajanga ozüng alema sen saruba den sen akhangtsü atema nisung pur aoba mazüokteter, ta police-i Mongolbarnü metetdaktsü.
“Garo Hills tesem nung ozüng alema sen sarur aser sen akhangtsü atema nisung apurtemi Nagaland, Manipur aser Tripura state tem indang SIM card amshir,” ta Inspector General of Police (Operations) G H P Raju-i ashi.
Tura, Garo Hills district nung tepuokdak anüker mapa (jail warder) inyaktsü atema merangdangi aruba lanur ka Hombar nü police-i sota ayuba sülen iba osang jangja aküm. Pa ket nungi ozüngi memelaba SIM card 60 nguteta lir, ta Raju-i ashi.
Iba asanguba tenüngji Blutcher Sangma lir aser pa anema ken o ka benokogo.
Police-i ashiba agi, pa ket nung aliba SIM card temji Garo National Liberation Army (GNLA) telok nem agütsütsüba liasü.
Raju-i, GNLA aser telungpur telok balalai ozüng alema sen sarudang, sen akhangtsü atema nisung apudang aser ozüngi memelaba mapa tanga inyakdang tongteprateptsü asoshi ‘black SIM card’ amshir, ta ashi.
Tang nguteta aliba SIM card tem ya service providers/dealer koba indangar putettsü atema kuli bushidar aser Department of Telecommunications (DOT) tetuyuba raksaba atema ozüngi melaba ama inyaktsü, ta Raju-i ashi.
State Director General of Police, Rajiv Mehta-i Garo Hills tesem nung security inyakyim asadangba sülen district police lennirtem dang district shia nung iba ama ozüng alema benshiba mapa atalokba tesemtem aser ozüng alema sen kanga bulua saruba tesemtem indang ‘map’ yanglutsü tetuyuba agütsüogo.
“Telungpur sadema meinyakdaktsütsü asoshi police-i item tesemtem nung mera balaka agitsü,” ta Raju-i metetdaktsüogo.
Paisa, iba ama tatalokba nokdangtsü asoshi raliwalirtem amenba nija garitem asoshi ‘security convoy’ agütsütsü, ta ashi.