Meghalaya: Virgo factory nung inyaker par 7 pua bener ao

Shillong, February 20 (Agencies): North Garo Hills, Damas nung aliba Virgo cement company indang factory nung mapa inyaker par tenet Garo Hills nung amenloker aliba ASAK telungpurtemi pua bener ao.
Garo Hills tesem ajunga nung factory ajak agi Virgo Cement factory ya dang lir. North Garo Hills, Damas tesem nung aliba factory pasasa menokdakteti aliba tensa ka nung iba tesem nung telungpurtemi mapangshia amaker aser iba factory nung inyakertem pua bener aoer.
South Garo Hills (SGH), Sankini-Dapgre tesem nung shinü long belenba tesem anasa nungi par tener pua bener ao. Iba tatalokba ajanga factory-i oset belenba meshimeshia anenogo, aser ibaji ajanga oset yangluba kanga ajemogo. Par 7 kümzüktsü asoshi police-i kanga meranga bushisüngdangdar.
Nisung 7 rongnungi gari anir 6 aser gari yanglur ka ta pua bener aoba jangjaogo. Parnok tenüngtemji: Shyama Rabha, Manoj Das, Dipak Baiswa, Khitish Rabha, Amulya Kalita, Dinobandhu Roy (gari anir) aser Kameshwar Pandit (gari yanglur) lir. Parnok ajak North Garo Hills aser Assam nung alirtem lir.
Küm 25 tain factory ya telungpurtem aser ashi-auertem atema sen melamela rakzüktsü atem tesem tajung ka ama lir.
“Factory takok ngua anir aotsü onok asoshi kanga tasak kümogo, kechiyong factory nung mapa inyakertem mapang shia amokmerener. Onok mapangshia oset meyanglui mapa anendaka ayur, kechiyong mapa inyakertem mapangshia amokmerener aser ibaji ajanga parnok mapai arutsü asoshi nungnanger,” ta factory den tongtepratepdang osang ka ajanga metetdaktsü.
Taoba mapang 2015 küm nisung tamajungertemi factory kishi nung grenade tem mereplokja amak. Maneni factory kibur dang nungi sen meshitsü nükjidong nung gari anirtem pua bener ogo.
Sen meshiba aser amokmerenba telungpur telok ajak nungi arua liasü. Tangbo item teloktem timba ka temai adokogo, saka factory inyakyim nung timtembo kasa dang lir.
“State balala nungi aser Khasi-Jaintia Hills tem nung aliba company balalai onok den tokteper, aser iba amala tensa ka nung factory anogo ka danga mapa meinyaki shibanga ayutsüji onok asoshi kanga takoksa lir. Mapangshia company nung mapa inyakertem pua bener aoba aser amakba ajanga factory ita aika shibanger ayur. Iba tia nungbo tarutsü nung onok kechi tiai aitsüar memetet,” ta company osang ajanga sa ashi.
Tura nung amenloker aliba NGO Ahcik Youth Council (AYC) ajanga telungpurtem dang pua aliba nisungtem chioktsü asoshi mepishiogo.
“Sensaker mapa inyakertem apuba ajanga kodaser asenoki state jenjang ngutettsü? Onoki item nisungtem par kinunger tenüng nung chioktsü asoshi mepishir. Yamala maparen ajanga Garo Hills alima ajak tsüngdang tenüng tamajung tali shisangdaktsür,” ta NGO nung tongti tezülur, Shoshan A Sangma-i ashi.