Meghalaya: West Garo Hills nung truck anir ka tepset

Tura, February 16 (Agencies): West Garo Hills nung Dollongre anasa Paikan nungi kilometer 60 shi pilar küm 25 tain truck gari anishir ka mejangjaba nisungtemi tekolak ajak ajasaa tepseter tokja lia tanep nguogo.
Tasüsang tenüng ya Ram Nath Rai lir ta jangjaogo. Pa Bihar, Samastipur district nungi lir, aser tang Tura nung Thakurbari tesem nung telidak liasü. Pa tekolak nung arok aroka yiruba ajanga asü amai ajiteter. Pa tasümang yimtsüng anasa toktsür liasü, aser pa ket nung aliba sen aser cell-phone ajak bener oadoker liasü. Tata gari koba pai ania liasü, iba garijia lenmang tezülen anioktsür liasü. Pa tanep anepongi tepset.
Iba tatalokba osangji Jengjal police outpost nung agütsü. Jengjal outpost ya lendong atalokba tesem nungi kilometer 14 shi pilar lir. WGH district nung magistrate dena lia iba ken o nung tasüngdangba kaogo, aser iba sülen Tura Civil Hospital-i post mortem atema bener ao. Iba post mortem agiba osang asüng angutsü imlar.
Iba tata gari number-ji RJ- 23GA 4335, aser iba gari shishilembar ka indang lir, shibai Food Corporation of India (FCI) atema contract nung jang aser tanga oset Tura aser EGH nung Williamnagar FCI godown tem asoshi belener.
Iba tata gari yashinep Bongaigaon FCI nungi Tura-i oset bener arutsü asoshi apusoa liasü.
“Yasüng 9:00 ako tashi nung iba gari NH 31, Assam, Goalpara nung Paikan anasa tanga tata gari ana asem den külemi liasü. Gari anirtem chi chiyungba sülen iba tesem nung dang mejang, saka iba gari tanga tesem kati oa liasü,” ta Rai’er kinunger kati ashi.
Iba ken o nung handyman shiba Rai den külemi liasü pa iba tatalokba sülen samaba tang tashi mongui lir. Pa ya SWGH, Garobadha anasa Kathalbari yimtsüng nungi ta temolung melemi bilemer.
Iba dak sendakba ken o nung superintendent of police, Mukesh Singh-i, tasüba yimya PM osang aruba sülen metettsü ta ashi.
“Tekolak tesem aika nung yirua lir, saka injang agi asü kechiar tang tashi memetet. Tasüsangi yasüng tedi den jembidang pa Paikan nung lir ta ashi, saka parnok Assam nung Bongaigaon-i aoer sür nung kechiba WGH-i meyipa aruar aji dang bushisüngdangdar, aser iba sülen ang osang tejangja metettsü,” ta Singh-i ashi.