Meghalya nung PN Syiem tenüng nung sen alem

Shillong, February 27 (Agencies): Meghalaya nung February 27 nü ADC election agitsü anogo ka lia KHNAM züngsemtemi NPP candidate aser taoba KHADC CEM, PN Syiem tenüng nung sen alemer nisung 2 apu.
February 26 nikongtsütsü KHNAM züngsemtem (tetsür aser lanur)-i nisung anaji apu. PN Syiem-i Mawkhar-Pynthorumkhrah constituency nungi tokteper.
Wahingdoh, Shillong nung nisung ana jagi candidate PN Syiem tenüng nung sen lema alidang apu aser social media nung iba osang prokshir.
Ajisüaka, PN Syiem-i iba osang ya tiyazü ta ashir aser senji polling agents atema liasü ta paisa shisem.
“Tanga party temi tai tongloktsübaji kuli mali aser magizüker” ta Syiem-i osangbener dang ashi.
“Yasüng Wahingdoh nung atalokbaji election nung inyakba mapa ka dang liasü. Polling station tem nung chiyungtsü, süngo aser amtsük den tanga nüngdaktem agütsütsü atema candidate temi pei polling agents nem sen agütsübaji yimya dang lir” ta Syiem-i ashi.
Commissioner & Secretary in charge District Council Affairs department, Tining Dkhar-i ashiba agi iba dak sendakba nung FIR ka benoka lir aser bushisüngdang südar.