Mehbooba-i Anantnag by election nung vote tali 12,000 agi takok angu

Srinagar, June 25 (Agencies): Honibarnü Jammu & Kashmir Chief Minister, Mehbooba Mufti-i Anantnag Assembly constituency by election nung vote tali 12,000 dak tema agi takok angu.
Iba ya la atema Jammu & Kashmir Assembly nung pezübenbuba züngsem akumer lir.
Peoples Democratic Party Tir, Mehbooba Mufti-i vote 28,000 nungi vote 17,000 dak tema angu aser la den atongtepa tanabuba jenjang nung Congress nungi Hilal Shah-i vote 5,589 angu.
Ano National Conference (NC) nungi Iftikhar Hussain Misghar-i tasembuba jenjang nung vote 2,800 dak tema angur. Mapang ka nungbo iba constituency nung NC kanga tashi itta liasü.
2014 election nung Mehbooba tebu aser taoba chief minister, Mufti Mohammad Sayeed-i iba constituency nung vote 6,000 shi ngua liasü.
Tang Mufti ya Anantnag Lok Sabha constituency nungi MP lir aser tan by election nunga lai takok nguogo.
Arishi küm 57 Mehbooba ya Anantnag Assembly election candidate ti rongnung ka liasü, aser iba menden nungi MLA aser taoba chief minister Mufti taküm January 7 nü asüba ajanga iba menden tazüng aküm.
June 22 nü vote agütsü aser vote agütsür nisung 28,446 rongnungi nisung 356-i NOTA (Non Of The Above) nung anem.

You must be logged in to post a comment Login