Mehbooba-i J&K sorkar tashi magizüktsü akok

Jammu/Srinagar, January 29 (Agencies): PDP Tir, Mehbooba Mufti-i tang tensa nungbosa Jammu & Kashmir sorkar tashi magizüktsü akok, kechiyong BJP-PDP teloktep nung obang mapu kar lir, ta Hokolbarnü party osang ka ajanga ashi.
Tanü IANS osangbener den jembidang Peoples Democratic Party (PDP) tongti lenir kati, “Iba ya la (Mehbooba) state nung chief minister tasen atema tenangzükba agitsü asü magitsü, ta asübaji masü. La tebui ita 10 yimsüsüba mapang party ana teloktep onüktem meinyak, kechiyong BJP-i tamentaktak meshisadangi nangzük ta lai bilemer,” ta ashi.
PDP lenirisa, “La tebu aser party-i nüburtem dang nangzüka alibatem atema la shisabulur,” ta ashi.
“Mufti (Mohammad Sayeed) Sahib alima nungi pilaba mapang nungi tenzüka Mehbooba-i kanga süoki ia shisadanger. BJP den maneni loktepa alitsü asoshi lai melung melemteter ama reprangteter,” ta party lenirisa ashi.
January 31, 2016 nü Srinagar nung ayonga aliba party senden nung sorkar akumtsü atema o melemteptsü, ta party osang ka ajanga ashi.
Kasa osang ajanga, “Onoki party indang onüktem, grassroot level nungi party tashi itshitsü aser iba dak sentakba tanga onüktem nung o lemteptsü, saka sorkar akumtsü atemabo mejembitsü,” ta ashi.
Party osang ajangsa, “La yimtenren nung mapang talangka alitsü, anungji nüburtem dang nangzükbatem lai meinyak tashibo lai sorkar tashi magizüktsü,” ta ashi.
Item osangtem ya atangji süra kobi melii state nung mapang matongdang election agishitsü akok, kechiyong state nung National Conference Party aser Congress Party napronglai tanga party den lokteptsü memelunger.
2014 assembly election nung PDP-i assembly menden 28, BJP-i 25, NC-i 15, Congress-i 12, CPI-M-i 1, Peoples Conference-i 2 aser tangartemi menden pezü nguteta liasü. Iba sülen PDP aser BJP na lokteper sorkar akum.
Mehbooba chief minister kümra Muslim tsürtem rongnung mezüngbuba J&K Chief Minister ji la asütsü. January 7, 2016 nü Mehbooba tebu aser J&K nung taoba Chief Minister Mufti Mohammad Sayeed asüba sülen PDP-ibo parnok lennir Mehbooba tebui toktsüba menden nung mendaktsütsü mulunga lir ta metetdaktsüogo saka tanü tashi lai J&K nung chief minister inyaktsü atema telemtetba agia mali.