Meimchir atema lendong tulutibaji kiralongraba lir: Modi

Paris, June 03 (Agencies): Tanü France yimtiba, Paris nung India Ato kilonser, Narendra Modi-i alima linüktem dang, kiralongraba aser alima tsüngsang-mopung melenshiba anema ano taliba raratsüla, kechiyong ana ya ali meimchir atema lendong tulutiba lir, ta metetdaktsü.
Tanü Paris nung aliba Elysee Palace nung France Tir, Emmanuel Macron den külemi osangbenertem den jembidang Modi-i, “Tanü alima atema lendong tulutibaji kiralongra lir. Asenok alima nung linüktemi linük sasep nung aser linük aika longjemer inyaka arur,” ta ashi.
France linüki alima tsüngsang-mopung melenshiba anema meranga raraba atema tenüngsang agüja Modi-i, “France-i alima tsüngsang mopung melenshiba anema nendaka inyaker aser maneni inyaktsü. Paris accord framework nungdang masü saka mapa onoki mapa agi inyaktsü,” ta ashi.
Alima nung fossil fuels ajema amshitsü atema France Tir-i International Solar Alliance atema inyakba asoshi pa nem tenüngsang agütsü.
Kasa senden nung France Tir Macron-i, pai India den defence, maritime security aser intelligence nung amalitepa inyaktsü, ta metetdaktsü.
Paisa, “India-i kiralongra anema rarabaji France-ia nungiter,” ta ashi.
“Asen linük nüjiso atema India nunger sepai aika süogo, aser ibaji asen linük ana tesendaktep ajanga kuli sayur,” ta Macron-isa shisem.
Tanep Modi-i France Tir tasenba, Macron den linük ana dak sendakba onüktem aser alima onüktem- kiralongra aser climate change nung o lemtepa liasü.
Modi-i, “India aser France na alemli nungi tesendaktep junga lir,” ta ashi.
Modi tanep Russia nungi France-i oa liasü. Iba jakdang pai Russia Tir, Vladimir Putin ajurua senden amenba den külemi international economic forum nung dena liasü.
Modi-i Germany aser Spain na semdanga lenirtem ajurua senden amenba sülen pai Russia semdang, iba sülen tang tesüsa France semdangogo.