Meimchir kümzüktsü atema kiralongra pusemba anentsüla: Swaraj

March 01, 2019 nü Abu Dhabi nung 46buba Organisation of Islamic Cooperation (OIC) Foreign Ministers senden nung External Affairs Minister, Sushma Swaraj-i jembiba noksa nung angur.

Abu Dhabi, March 01 (Agencies): Tanü External Affairs Minister, Sushma Swaraj-i, kiralongra ajanga takümtem samatsür, alima tesem balala tashi meitdaktsür aser alima rangben timtemi yoker, ta metetdaktsü.
Tanü Abu Dhabi nung OIC senden Foreign Minister tem senden nung tetushi tejaoker o jembidang Swaraj-i Pakistan aitsüba olen ka nung, “Meimchirtem kümzüktsü atema linüktemi kiralongrartem mejenokdaktsütsüla, senotsü agi meyaritsüla saka kiralongra infrastructure raksatsütsüla,” ta ayongzük.
Organisation of Islamic Cooperation (OIC) ya Muslim nunger nütsüng timba aliba linüktem tentet lir, aser iba senden nung jembidang India External Affairs Minister, Sushma Swaraj-i, “Ni Mahatma Gandhi aliba linük nungi aru, kong sarasadem ajak yimjung agi tembanger. Nenoki yimjung, tesünep, rongsenkettsüng ainba aser nüburtem azükaru aginüba nung ni-a nenok pusemer,” ta ashi.
“Asenoki meimchirtem kümzüknüra, asenoki kiralongrar jenokdaktsürtem aser senotsü agi parnok yarir linüktem dang kiralongrar camps raksajang aser parnok jenokdaktsüba den senotsü agi yariba anenang, ta ashitsüla,” ta lai ashi.
“Islam tetezü yimjung lir, Allah tenüng 99 prongla tetezüji rara masü. Iba denji kasa alima nung tamangba yimsü ajaki yimjung, temeim aser adianu temeimtep atema sayur,” ta Swaraj-i züngsem linük 57 aliba OIC senden nung metetdaktsü.
February 14 nü JeM kiralongrartemi Pulwama nung sepaitem amakba sülen India o Pakistan na tsüngda mepetmesü tulu adoker aliba mapang ka nung lai item o ya jembiogo.
Tang mezüng OIC senden nung adentsü atema India jaok. Iba senden nung India tetushi tejaoker jaokba anema Pakistan Foreign Minister, Shah Mahmood Qureshi-ibo iba senden nung maden.
Yaküm Bangladesh-i Organisation of Islamic Cooperation nung India ama Muslim nütsüng ajema aliba linüktem “observer state” ama shimtsü benoka liasü.