Meimchir Temeden

– P. Renthy Jamir.

Tang ya alima kinük pezüsülen meimchir temeden (Human rights) atema ayimtener. Communist limatem nunga freedom of press sadema lapoktsür. Iba putu nung ngutetba tulutibaji nisungtemi libaliro yimya yanglushia tebilemba melenshiteter. The greatest discovery of our generation is that people can alter their lives by altering their attitude or mind. Ken bilembasa ozüngji ozüng ya tatem ta masü lenchii arua atsüanem kateper. Naga nungera mapang talangka Freedom of Press mangatetdang senti taküm jenti samaogo. Kari telok kar anema yabo tim masü ta zülura injang achitsü kecha O mali tatem might is right. Saka linük tenzüker telok balalai kodang Freedom of Press angateta taliba yimya melenshi, Naga limai tesünep bentsür aru. The greatest discovery. Tang Naga nunger ochi tasü tait osang zülur (1) Thepfulhovi solo (2) Kaka D Iralu (3) Z.Lohe (4) Khekiye K.Sema (IAS) (5) Kahuto Chishi Sumi nungertem lir. Parnoki state Government ochimashi teraksa inyakim anema ano tongtibangsa linük tenzüker telok balala tashiim mapatem aija zülur. Saka telok balala jagi onok anema yamala zülura tatem tashi bushitsü ta taten metsübudaktsür. Saka inyakimji melenshir. Ano yabo tim masü zülu ta lira parnoki O lep (Rejoinder) zülua metongshiteper. Napoleonia Freedom of Press tsübua liasü, aser parnok sadema toktsü.
Tawa Ao senden Tir M. Toshi Jamiri Lenjeter osang zülur den sensaksemba yamai azüng “Tanü Aor tensa tia ya tangari imlaba ama mesüi lenmang aisü nung tamakok lir ama nibo bilemer” Ano maneni pai ya shisema lir, “Nüburi pei temeden angateta nübur telongjem tashi meteta kodang nokdakdir idangji temelenshi arutsü imlar.” Pai ashi ama Aor ajak longjemba agi Ao senden ta ajar yangji ajak pei temeden lemsateptsüla. Tang ASLB-i mezüngbuba adokba calendar nung ano temelenshitsü lir ta zülutepba ya taitem metongshitsüla ta dang zülur. Kechiba süra tang 2018 küm Aor nüngja nung Calendar ana adoka lir. Merangkong nungeri ka (Kechiyong parnok akhidang nungi adoker) aser ASLB-i ka, saka anaji ita anogo nüngja balala tsüngküm mongpua balala. Tatishitsü Merangkong Calendar nung November ita Apalemyi ta lir alu chimar apa lema ayuba ASLB Calendar nungbo December Luchii ta lir alu achi tialong. Alima rangben Hemisphere ana dang Half Earth küma lemsar Geography nüngja ajar nung Ao lima Anaki nungi Longkhum tashi Km 120 majung alinük telongzük nung mongpu balala masütsüla.
Aor inti atema tsüngküm mongpu kasa putepa Calendar ka dang adoktsüla yimshia kaka masütsüla adoka aliba ajak ya ken meyipa reprangshitsüla ta tajitetba lemsateper. Saka Ao senden Arla akaya-a masü ASLB anema masü. Kechiyong melenshiyonga odar ta asüyonga kecha temelenshiba mangu. Tang Ao sendeni ayimoktsüba osang kaket zülu nung mesüi tsüngdong arua tebilemba angatetteptsü metetdaktsür ta asüba ya tezülurtemi hau asür saka Aor anemer ta züngshitsü tatem tashi bushitsü ta asüba yabo Freedom of Press shibangtsür ta bilemer. North Cliffe-i tashi tulu ana indang yamai zülua lir. “The Power of the Press is very great but not so great as the power of suppress” süra Aor Land of Pioneer nung tashi tuluba ana ya koba amshi nung nübur ajak asoshi tajangzük asütsü?