Meimchir temeten atema nokdakertemi Bangladesh aitsür

New York, June 17 (Agencies): Alima ajunga nung meimchir temeten atema nokdakba teloktemi Bangladesh sorkari kiralongrar aser telungpur ta temulung malemba nisungtem apuba maparen anema ola adoktsü tenzükogo.

Islamic State (IS) ta ajaba kiralongrar teloki Bangladesh nung tawa lendong kanga sashia atalokdaktsüba sülen Bangladesh police-i kiralongrar aser telungpur ta temulung malemba nisung 11,000 dak tema taoba hopta tatemlen aser tan hopta tetenzüklen tsüngda pua liasü.

Ajisüaka, khen nung temulung malemba nisung meyirijang jenti apubaji kuli tejangja meli nisung apuba maparen lir aser yamaji inyakba ajanga Bangladesh nung lendong atalokbaren menokdangtettsü ta US kübok New York nung tesep tentetba Human Rights Watch (HRW)-i metetdaktsüogo.

“Khen nung temulung malemba nisung meyirijang jenti apuba maparen ya Bangladesh nung mapang shia atalokba maparen ka lir. Ajisüaka, yamaji inyakba agi kiralongrartemi lendong atalokdaktsüba maparen menentsütettsü,” ta HRW’er Asia Director, Brad Adams-i metetdaktsü.

Ano, Bangladesh police-i süpokrem sen agütsür temulung malemba nisungtembo chiokadokba osanga angazükogo ta paisa shisem.

You must be logged in to post a comment Login