Meira Kumar-i Bodbarnü tenüng agütsütsü

New Delhi, June 26 (Agencies): India nung Opposition indang presidential candidate Meira Kumar-i Bodbarnü la indang nomination papers agütsütsü.
Taoba Lok Sabha speaker Meira Kumar-i Tir election atema tenüng agütsüdang Congress tir Sonia Gandhi aser taoba prime minister Manmohan Singh nati la meintsü, ta Congress osang ka ajanga metetdaktsü.
Meira pusemer telok 16 nungi lennirtemia la meintsü aser parnok rongnung National Congress Party lennir Sharad Pawar, West Bengal Chief Minister Mamata Banerjee, CPI-M lennir Sitaram Yechury aser Rashtriya Janata Dal lennir Lalu Prasad nungertem adentsü imlar, ta osang ajangasa shisem.
National Democratic Alliance (NDA) atema presidential candidate Ram Nath Kovind-i Tir election atema tenüng agütsüogo aser pa den Meira Kumar-i tokteptsü.
Taküm Tir tetoktepba nung NDA candidate Kovind-i takok tulu angutsü teimla lir.
Deobarnü Meira Kumar-i electoral college züngsemtem dang, July 17 nü election nung pei mulungsentsüi ashiba sülen anidaka vote agütsütsü atema tayongzükba agüja liasü.
Yimten tsütsü tajangzük angutsü tebilemba atema President indang office mamshidaktsütsüla, ta laisa ashi.