Meira Kumar-i linük Tir election atema tenüng agütsüogo

New Delhi, June 28, 2017: Bodhbarnü Parliament House, New Delhi nung opposition party temi shimba linük Tir candidate, Meira Kumar-i election nung tokteptsü atema la tenüng agütsüba noksa nung angur. Kasa noksa nungsa taoba Ato kilonser, Manmohan Singh, Congress Party Tir, Sonia Gandhi, NCP tongti lenir, Sharad Pawar aser CPI-M lenir, Sitaram Yechury nunger den opposition lenirtem angur.   

New Delhi, June 28 (Agencies): Bodhbarnü opposition party temi shimba candidate, Meira Kumar-i Tir election atema tenüng agütsüogo, iba mapang nung la den Congress Tir, Sonia Gandhi aser taoba Ato kilonser, Manmohan Singh na densema opposition lenirtem aika liasü. Kumar den NCP lenir, Sharad Pawar, CPM lenir, Sitaram Yechury aser TMC lenir, Derek O’ Brien nungera liasü.
Opposition party 17-i Tir candidate atema taoba mapang Lok Sabha Speaker aser taoba Union Minister, Kumar shima liasü, aser lai BJP-i aniba NDA candidate, Ram Nath Kovind den tokteptsü.
Kumar aser Kovind naprongla ya Dalit nunger lir.
Yashi osangbenertem senden ka nung Kumar-i, June 30 nü Gujarat, Sabarmati Ashram nungi tenzüka lai nüboyimtsü, ta sangdonga liasü.
Tir election ya Dalit nunger ana tsüngda tetoktepba ka lir, ta osangkakettem nung adokba ajanga ya asen loktiliba tangatetba sayur, ta lai aitsü, aser iba dak sendakba nung lai, “Linük nung temaba menden atema agiba election ya kin kidong nung ajemdaker toktepba election ka ni mesüdaktsüner. Linük senso shingaia ibaji maginütsü. Onoki tangatetbatem nung ajemdaker tokteptsü, ” ta ashi.
Tanü BJP lenir tain aser Information & Broadcasting Union Minister, Venkaiah Naidu-a Parliament House-i oa liasü, aser iba mapang nung pai osangbenertem dang, “Tangatetba balala tsüngda toktepbaji kechi. Iba election nung party tem tangatetba mali. Iba ya Tir menden ka indang lir,” ta ashi.
Paisa, Bihar CM Nitish Kumar, Telangana Rashtra Samiti, Biju Janata Dal aser AIADMK densema aikati NDA candidate pusemtsü aser ozü candidate-i melamela takok angutsü, ta metetdaktsü.