Mejangjaba nisung kari Dr. Imtiwapang Aier’er kidang injang khaloktsü AKM, AKTM, SSTM nungertemi kukua aitsür

Dimapur, July 10 (TYO) : July 9, 2015 aonung 11:15 ako meta Forest colony, Kohima nung Geology & Mining Parliamentary Secretary, Dr. Imtiwapang Aier’er ki dang mejangjatetba nisung kari injang khaloktsü.
Parliamentary secretary, Dr. Imtiwapang ya pa kinüngtsü indang official quarter nung alir aser lendong atalokba mapang par kibong ajak kidang liasü. Ajisüaka, tia kaa iba tatalokba nung nisung shinga yiruyibong mesüra tasüba majuru.
Iba mapa ya kechi atema aser shirnoki inyakar ano memetet aser Kohima police osang ka ajanga ashiba agi, iba osang angashili police telok ka tesem tonga orr bushisüngdang asü.
Iba mapang parnoki .22 pistol injang tazüng ana angu aser Dr. Imtiwapang’er kima kishizüng nung injang agi akhaba tarak ka angu, ta Kohima police osang ajanga ashi.
Iba tatalokba atema bushisüngdangtsü tenzükogo.
Ao Kaketshir Mungdang (AKM)-i sangdong ka ajanga, mejangjatetba nisung kari Dr Imtiwapang aser par kibong taküm agitsü merangba mapa kukua aitsür ta metetdaktsü.
Tangatetba shitak malir aser ozüng anema inyaksangshirtemi mapang shia nübortemi shimtetba lennirtem anema mapa inyakba angudang kanga aoksar. Yimsüsürtem dak ibala mapa inyakba ya lokti nung nübortem anema inyakba mapa ka lir. Anungji AKM-i labi mapa inyakertem kukua aitsür aser tashitemetertem aliba lokti ka nung item mapa inyakertem atema shilem mali, ta AKM tir L Jemti Longchar aser tongti tezülur Bendangkumba Aier nati külem sangdong nung shia lir.
Ozüng amertemi tekaratiba nung iba tatalokba bushisüngdangtsü aser aibelenertem pua merenshitsü akhanger, ta AKM mendenpurtemisa metetdaktsüogo
Ao Kaketshir Mungdang-i Parliamentary Secretary, Dr. Imtiwapang Aier aser par kibong den külemi noktaker aser Tsüngremi pa aser ano asen lennirtem ajak lendong nungi kümzükang ta sarasademtsür, ta L Jemti Longchar aser Bendangkumba Aier natisa sangdong nung shia lir.
Asetkong Kaketshir Telongjem Mungdang (AKTM)-ia sangdong ka ajanga Dr. Imtiwapang taküm agitsü mapa inyakba kukua aitsür ta metetdaktsüogo.
Asetkong nunger senso tajung Dr. Imtiwapang taküm agitsü merangba aser par kibong lendongbang nung yutsüba den tetsübu tensa bener arutsüba aitsür, ta AKTM-i ashi.
AKTM-i ozüng amertem dang tekaratiba nung iba mapa inyakertem pur merenshitsü akhanger aser tarutsü anogotem nung ibala mapa inyakra odangbo meyutsütsü, ta tir Rongsennükshi Aier aser metetpela zülur Jongpongjiten nati sangdong ajanga metetdaktsüogo.
Sungratsü Senso Telongjem Kohima (SSTM)-ia Dr. Imtiwapang’er Aier kidang injang khaloktsüba kukua aitsüba osang metetdaktsüogo.
Shiametetertem aliba lokti ka nung iba ama labi mapa inyakertem talidak maka. Asen lokti nung yimjung aser temeten lidaktsütsü atema telok ajak aser sensosangertemi ibala tatalokbatem aitsütsüla, ta SSTM tir Sangtemchuba aser Tezülur Senkalemba nati sangdong nung metetdaktsüogo.
Ozüng amertemi tekaratiba nung aibelenertem pua merenshitsü akhanger, ta SSTM-isa metetdaktsüogo.