Mejangjaba nisung kati Alia Bhatt tepsettsü amokmeren

Mumbai, March 2 (Agencies): Bollywood nung film yanglur dangi par jala Alia Bhatt taküm melena sen lakh 50 meshia memetetba aser mejangjaba nisung kati phone ajanga amokmeren. Senji magütsüra Alia tepsettsü, ta iba nisungba yagi amokmeren.
Iba osang angazükli Bhatt-i Mumbai crime branch nung ketdangser ka den tongtepa iba anema Bodhbarnü ken o ka benokogo.
“Ozü kibong amokmerena sen meshiba MH & UP police-i mapang shitak nung iba ken o bentetogo. Kanga pelar! Ka dang nungibo ajak senteper inyakbasa tajungba,” ta Bhatt-i tweet asü.
Phone asüsang-i Uttar Pradesh nungi call asü ta jangjaogo. Iba call February 26 nü asü aser iba nisungbai Lucknow nung bank ka nung iba sen inoktsütsü asoshi Bhatt nem tejangja osang agütsü. Mejangjaba nisungi maneni Whats App ajanga Bhatt amokmerena osangtem yok.
Osang ajanga angazükba agi iba nisungba Mumbai aser UP police-i külemi mita aoba mapang ka nung pua Uttar Pradesh nung puoka lir. “Pai Bhatt cell phone number kodaser angu aji dang onoki bushisüngdangdar,” ta police nung ketdangser kati ashi.
Alia-i tongti shilem agiba film ‘Badrinath Ki Dulhania’ theatre tem nung March 10 nü sayatsü asoshi renema lir. iba film Shashank Khaitan-i direct asü aser Karan Johar indang ‘Dharma production ajanga produce asütsü.
Bhatt asoshi amokmerenba osangji dang ya mezüng masü. 2007 September ita nunga pa jala Pooja Bhatt aser tenu Mukesh Dhoka film yangluba atema ‘fugitive gangster’ Ravi Pujari-i amokmerena liasü. Iba film ya ploice officer ka aser pa kinungtsü kiralongrar ka indang otsü liasü.
2013 January nunga actress aser film yanglur Pooja Bhatt, mejangjaba nisung kati amokmerena liasü.
Maneni 2006 June ita underworld don Ravi Pujari’er nisung kati Bhatt indang office nung pa majurutetba sülen injang agi akha.