Mekong ayong indang ken o jembir

Phnom, Aenjeti 10 (Agencies) : Southeast Asia kübok Mekong ayong südanga aliba linüktem nungi lenirtem adenshia tanü Cambodia yimtiba nung senden ka menogo.
China nungeri tzü tangdang teimba yanglutsü merangba koba ajanga tzü lenmang melenshia kümdakja iba temeket nem khuret bener arutsütsü ta arendaka bilemba mapang ka nung tang iba senden ya amener.
Tanü iba sendenji Cambodia ato kiloner, Hun Sen aser China ato kilonser, Li Keqiang na mendenpur ser agia liasü aser idakji Thailand, Laos, Vietnam & Myanmar nungi lenirtem aruagi aden.
2015 küm China-i tenzükba ‘Mekong-Lancang Cooperation forum’ nükjidongji Mekong sub-region nung aliba nübur million aika peisasa ajangteta litettsü aser taküm jenjang renloka bener aotsüji lir.
China nungeribo Lancang ta ajaba Mekong ayong ya Southeast Asia linüktem asoshi kanga dang tongtibang; iba ayongküm nung aliba nisung million 60 dak tema atema chiyungtsü, tzü aser olioraba lenmangji iba ayong ya ajanga lir.