Mekümdangra Tsüngremi Ao kin nungi milendong bener aotsü

Mokokchung, Nov 1 (TYO): Ao Baptist Arogo Mungdang (ABAM)-i ayongba ‘Ao Kin Asentenshi’ sentong Bodbar aonung yangi Imkongmeren Sports Complex Mokokchung nung meraketa tenzükogo. Mezüng aonung Ao senso meyi ter dak tali adenshia liasü.
Tsüngrem o jembir Rev. Maong-i “Arogo nung asentenshi” onük nung jembidang, arogoji tammang tia nung alir nüburtem dangi Khrista tesangwa adokdaktsütsü asoshi, Khrista tekümtet osang abentsü asoshi aser alima dangi Khrista kulisütsü asoshi tentetba lir, ta ashi.
Asenoki Tsüngremi shimtet masü saka Pai asenok shimtetba lir. Nükjidong yur Tsüngremi Ao kin shimtet. Aji saka, tanü Aori Tsüngrem masü saka rongsen dang külemer, ta pai ashi. Ao kini missionary meyirijang ter yoktsü atema Tsüngrem dang nangzük saka tanü tashi ibaji ataloka mali, ta paisa shisem.
Tanü Ao arogotem nung calendar adoka teinyaktsütem nung aika yanglua ayur aser arogo magazine balala nung teinyaktetba balala sangdonger, aji saka, arogo nung temeim mekonga kümogo, sarasademer aser tekülemer ajema kümdaki, ta paisa tatalokba kar tuteta ashi. “Mekümdangra Tsüngremi Ao kin nungi milendong bener aotsü menua mali”, ta paisa shisem.
Ao kini dang sarasadema ajemalua temenen nangzükra aser temenen nungi pilaa lira , Tsüngremi tai atoktsü aser ibaji Pa tenangzükba lir, ta paisa ayongzüka liasü.
Tsüngremi Ao kin nem Naga nunger anitsü khuret nungloktsü aser Pai Ao kin tangar dang alia ajungkettsü, aji saka, tanü asenoki Pa amadokogo. Iyongji luyim aisü nung Ao kin tekübokba jenjangi aluba mapang ka lir, anungji, iba asentenshi ya temenen nangzüka Tsüngrem nungi temoatsü anguba mapang ka südaktsütsü asoshi ABAM tir Rev. Dr. Noklen Lkri ayongzüka metetdaktsü.
Kasa sentong nung ABAM executive secretary Rev. Dr. Mar Atsongchanger-i tarur ajak pela agizük. Süngkomen Baptist Arogo Choir-i ken ajanga Tsüngrem osang aben.
Nov 2 nü sentep ana lir. Ka anepdang 10:00 ako nungi aser kaji nikongdang 4:00 nungi tenzüktsü. Mezüng sentep nung “Loktiliro asentenshi” omen nung Rev. Imdangmereni jembitsü aser nikong sentep nungji Rev. Lanuyangeri “Kibong Asentenshi” onük nung jembitsü.
Talang nung alir aser koda masü medenteter atema osang tajung kaji; sentep tagidak (Live) social media You Tube (Ao Kin Asentenshi) aser local cable T.V ajanga reprangtettsü akok.