Meküpdoktetba Sentsüh

– S. Aosüngküm Ozüküm, Dimapur.

Kechi tensa, komala mapang ka tenjidir tenjiaka ketdangsürtemi tamasa lenla ajaklen ayimjema asadangtsü tenüngdaktsü aser shisa lemsateptsüla aser asen kijai masadangtetra tangar danga asüngdangtsüla. Saka tang koba tashidak Covit 19 agi alima ajungalen menashia odagi iba indang shinga danga masüngdang aser sentonga kecha meyanglu sür tenük amur tapi agi khen mulungtet ozüng proshia ki shibanga yur kazüba agi tang asenok dak kechi atalok? Ita ana süia oaka Tsüngrem taochi agi kümzüka Nagaland telongtet nung Corona ta ajaba tashidak memeshia mali asü, saka idangji asenok tetsübu agi ki shibanger kazütepdang tilaba nungi tuluba tashi shisaramaa kümdaktsür mapang tajung aika malangzükteti süitema yokogo. Kechiba süra senso züngsem tajung, yimtsüyimbu, yim akhümdong arishir aika Tsüngremi mapang tetemsü nung taküm tangula agienogo, Pa/ La kodang südir yimtaki bener oang ta shia alinungji, parnoki ashiba angaa tasoli nung teret endoki arudi ta yimsüsür den osang agitep dang 0 tanang ajak jembimaa shisabulu khuret lemsatepaka yim süngkümi tasümang bener maitdaktsütsü ozüng lir langzüba to bilemtetdarma? ano pei süngkhümshi telong nung tsürabur, adianu sosemdangsem asüdaki arur senso tajungtema pa/lai langka raksar nemtener nisung ka ama tenükdang mait repranga asür den tepila sentong temli aotsü ozüng agütsüba toa nüklai arur marur. Item tatalokba ajak to kecha masü ama süitema odima? Asüng ser yanü asenok tsüngta yimjung nung putepa litetdima? Temulungjang telunglen nüktzü aneta tepushitepa ya tashi ataloker no! ta mulung zürepa alirtemi asen lokdi mulungsoa yaridima? Ashirdangashi tangar lushi nung artsü adena marudaktsütsü ta ozüng tesashi agi nokdangaka asen senso tajungji tashidak wara jagi asüba mesüra pa/ la dak iba tashidakji menaa melira aser ano asen lima telongtet nung menatepa aoba tashikji melira tim lenmang ka bushitsür anir arutsüba asüato. Kechiba shisa makai pokpu yimyim ama ammang süra ammang sangwa süra sangwa sang ta ozüng amertemi ayimoktsü, kechiba bendanglen nungi tasümang bener taru ta ayimoktsü? Ya khen bilemdangdi taso yimkong adena oa alirtemi senso saru
mesüra yim saru magütsüi ali asü? mesüra senso tajung ka memesüki sobaliba kar nung aibelena ali asü? kechiba tenük amur yimyim ayimer? Ajak atema koba tajungba asütsü ta asüngdangteptsüla asato. Ya koda süla ta kechiba shisa melemsatep. Süra tat, agi bendanglen alirtemia yimten aser arogo shinga nema saru magütsütsü anungji joko taru ta shira asenok tsüngta kechi ataloktsü? asürji mesüra par chirnurtemji tashidak wara jagi tonga lir mali ta tensa asadanger senso züngsem tajung saru toka alisang/ alila tasümangji akhümtsübu agüja agizüktsüba asato. Parnok to ayako ayako ta shirangba agi taneptsü bushia yim süngküm adena aoba dang nung koda. Parnok to Corona tashidak agi asübaa masü aser parnok to Corona virus- Covit-19 tashitak alir den meyoktepa lidaktsüba mesüra ayuba nisungtema masü nung koda. Yamaji atalok asünungbo sorkari tamasayongi asenok nem tasümangji magütsütsü nung koda aser asenokia memeshitsü, mesüra tapi agi shirangsangji asen kapuma nung mamoktsütsü nung koda. Asenoki tensa masadang aser kuli mebushidangi khen apitetba agi ozüng kümdaktsüba agi “Temu den meyotepba punak aitoktsü tasak asüba amai melarabo maitoktettsüsa tarak ketogo. Laishibai ashiba ama nisunger sangrasangji nung Tsüngremi tai apur ta aliba to tang ya shitak ataloker. Kechiba süra wara süitemerang süang ta shingaia meshitet. Ano na kechiba asü taa shingaia meshitet. Anungji tanga maparen o asür den tatembang anogoji meyokteptsü makok, iba anogo atemaji yimli ka kar! kasaji ozüngtsüzünga apidangerang yanglua shibanger mesüra salatsür nung koda. Saka asenoki aseni bilemba ajak to tabensa ama bilema mashilen angateter parnok nokdanga yur marudaktsübaji teti asoshi ‘ Asür Den Tsükchi Yima Ayuba lir. Iba dangji ‘Meküpdoktetba Sentsüh ta ajatsü akok. Kechiaser parnok to tipu lima nungi tanaben shilanga asenok den libaliru masütsü, Dawid-i ashi ama asenokang parnok aoleni aotsü. Tang asenoki parnok den kechi olen agi jembitsü? Nenok ajak taso yimkongi arur ama bilemang ta ashitsü asü? Iba melena asenoki parnok nem kechi agütsütsü? Asenok ket nung kecha maka, leper tsüngdang sentilong nangtena yujaka aji tamashi mapa ka dang asütsü. Kechiba tebilemdang makai ozüngji yanglu aser ayimoktsü? Temeim senso tajungtem tang tendak sorkar aser nübortemi inyakba mapa ya reprangangjo, kechiba India lima tesem balala nung koda masü tia nung alirtem tsüngdong tanii aor mesüra taa agüja anir arudaktsür? Parnokji asen shimang asüba agi.
Süaka, kümaka parnokji asen senso züngsem tajung asüba agi tashitak menaa lir ta metetsümonga anir arur. Kodang mapa ana tepilaji asadangdir asen mapa agi asen aitsür masü no? Karbo tashitak lir ta metetaka anir aru, saka karbo akhitelemren tashitak agi asü mesüra tantsür tambur kümer Tsüngremi arishi agien sür nung pei tasoli süngkhümshi telongi bener maitdaktsüba tepilaji shibai koba oren agi koda rasatsü? Iba to tamashi mapa ta agizüktsüla aser iba yimyim to tamashi yimyim ta asenoki agizüktettsüla. Asenoki aika metet ama ulua bilemer aser onsara shia metet ama khonang akümer, saka nisunger tekolok aser shisarajem ya telemtet ka dang asünung tashidak lir ta angashi mangashi ka nung iba tsüngken tsübudang süngkhüm shibanga yur kazütep iba to agi ya tashi atongtet aser iba tamashi mapa to agi akümli piyong menperongtsü mapa ka inyakteta ayu. Saka asenok asoshi asür den yimjung apu alatsü lenmang ka dang lir aser aji nüngdak ta bilemra laishibai tuyuba ama inyaktsüla. Israel nunger Ijip lima nungi apusodang Mosai Samuel teret pa tapubang nung bener apusoba asenoki Anitet 13: 19 angur, ano 2 Samuel 21:11-14 nung Dawidi Yabeshgilead nisungtem dak nungi Saul aser par chir Yonathan teret bener aruba angur. Kechiba teretji bener aru ta süra, iba teret nungji temoatsü densema lir aser sobaliba tajung sendakloka aliba agi mezüngyongi Mosai Samuel teretji bener apuso aser tangar terettemjia bushia bener arua pei lima nung arem. Iba züji tanüa asenok dak keta lirto. Asenoki asenok ya ‘mang metokshiba kin ta jembir’ aser yamaji inyaka arur, saka asenoki metetsümonga asen adianu mang pi yim pi li nung tokshia endokogo. Ajakji tensa masadang sür metongjemi inyakba agi lir. Anungji sensopur aser sensotsür kwika bendang lima tesem balala nung mang rema lir parnok teretji künübosa sensoli nung bener arua aremtsü bilemtsüla aser yamaji inyakra aji asür dang sentsüh keptoker asütsü. Ajita meinyakra par chirnur, semchisemnur mulung kurema mepelabaji asen lokdi asoshi tarutsü nungbo, süngjang tajung nung tarütsü tamajung aiba den sako asütsü aser asen yimten tobur mejungi akümtsü aser teronem memenem akümtsü akok ta kü mulung nung aria bilemba olen ka agi tangar dang tama tejakleni aoba senso tajungtem den lemsateper. Olen kar nung danga mejungmazü zülusema lira metongshiteptsü mulunga lir. Nia Ao senso tajung ka ama tarutsü nung asenok dangi tensa tia balala arudang lennirtemi anir tongjema inyakdaktsünübayong temulung ronga bilemba olen ka agi lemsateper. Tsüngremi iba ocet azünger ajak moajang.