Mel Brooks, Bafta Fellowship agizüktsü

February 08, 2017 (Agencies): Nüngtugu asayamener tejen Mel Brooks-i Deobarnü (12 Feb 17) Film Award sentong nung BAFTA Fellowship tetushi sempet agizüktsü renemogo.
Film aser television show balala nung shilem tajung agiba ajanga British Academy of Film and Television Arts nung ketdangsertemi, Producers writer/director Mel shimtet.
“Nüngtugu nisungtem paika rongnung nia züngsemba atema kanga dang pelar,” ta Brook-i ashi.
BAFTA indang tematiba tetushi sempet British chuba chir William, shiba BAFTA tir lir pai iba tetushi küm 90 tain Brooks nem Deobarnü London, Royal Albert Hall nung Film Awards sentong amongdang agütsütsü.
“Mel Brooks ya kangadang tesangra film yanglur ka lir, aser taküm British Academy Film Awards nung tematiba tetushi pa nem agütsütsü asoshi kanga pelar,” ta BAFTA chief executive Amanda Berry-i Brook shimba indang asüngdangdang ashi.
Temalen Fellowship angurtem rongnung Chaplin, Alfred Hitchcock, Steven Spielberg, Elizabeth Taylor, Stanley Kubrick, Laurence Olivier, Martin Scorsese, aser Helen Mirren nungertem lir. Sidney Poitier-i iba tetushi yaküm agizük.