Mel Gibson-i ‘The Passion of the Christ’ tarensen film yangluner

Los Angeles, September 1, 2016 : Hollywood star Mel Gibson-i 2004 küm yangluba “Passion of the Christ” film ajanga mangatettep kar adoka liasü aser tang ano pai iba film indang shilem ka yangluner.
Mel Gibson-i, iba shilem ya Yisu sür shia aruba dak tuluba rongloker yanglutsü, ta ashiba Entertainment Weekly osang ajanga metetdaktsü.
“Onoki ibaji atema jembir. Ibai mapa tulu asütsü aser iba film tenüng ‘The Passion 2’ masü saka ‘Resurrection’ ta ajatsü,” ta tawa Anaheim, California nung SoCal Harvest evangelical sentong ka akaba mapang Gibson-i pastor Greg Laurie dang ashi.
“Iba olung (Resurrection) nung rasaa aotsüji jenti lir aser ibaji kanga junga metettsü tim kechiyong onoki ibaji tenüng ka atema dang mesüdaktsüner. Asenok ajaki Yisu shia aruba otsüji zünga angateta lir, ajisüaka shitakba nung atalokbaji mesüka angateta inyaktsü asoshi iba tetetzü kanga aroka ia bushitsü nüngdaker, aser ibaji atema mapang tera agitsü,” ta pai ashi.
“Mad Max” film nung shilem agisang, Gibson-i “Passion of the Christ” film yanglutsü atema otsü zülusang Randall Wallace tenüng sanga “Wallace ji tezülur aser director khenyongi tajung ka lir, ta ashi.
Wallace-i pa nem nungloktsüba mapaji timatiba jenjang nung inyaktettsü, ta Gibson-i ashi.
Mel Gibson-i shilem agiba “Braveheart” film zülusang, Wallace-i, iba otsü atema tanaben inyaktsü jangrar aser ‘The Passion’ ya tetenzük aser iba dak sentakbaji otsü aika lir, ta ashi.