Mel Gibson merenshitsüsa kuli mongutet

Los Angeles, September 03 (Agencies): Braveheart film nung tongti shilem agisang, Mel Gibson merenshitsüsa kuli tejangja mongutetba osang ka jangjaogo.

Gibson aser tedong Rosalind Ross na August 15 nü Sydney, Australia nung cinema repranger kimai aludang noksa tangoker Kristi Miller-i tena noksa tangokba sülen pai la den tebang agi raraba den külemi, teka dena sangshi ta shia, Miller-i Gibson anema okadak ken o benok.

“Gibson-i tekabo mesangshi,” ta Gibson den külemi inyaker kati   ashiba sülen police-i bushisüngdangtsü tenzüka liasü.

Tesülen, “Gibson-i aibelenba küli tejangja mongutetba yong pa nem temerenshi kecha magütsütsü,” ta police-i osang ka ajanga ashi.

“Police-i bushisüngdang tesashi ka agia tembangogo saka parnoki Gibson aitsütsüsa küli tejangja kecha mongutet,” ta Gibson’er okatsür, Christopher Murphy-ia metetdaktsüogo.

“Gibson-i mezüng yongi iba tongloktsüba ya kenyongi tiyazü ta ashi. Police-i tenük küli alirtemi ashiba osang angadangba den külemi, CCTV ajanga tangokba video repangba sülen Gibson aibelena maliba osang jangatet aser tangbo Gibson temulung anisüngzükogo. Anungji mezüng ashi ama, iba osang ya olulu ka dang lir,” ta Gibson’er otongdar, Alan Nierob-ia metetdaktsü.

Gibson-i pa nem maksü bener arutsüba atema noksa tangokla kibur anema okadak ken o benoktsü tebilemba aliba osang ka Sydney Morning Herald-ia metetdaksüogo.