Melangteper Sandeep -a Rio Olympics nung shilem agitsü jenjang ngutetogo

Ulaanbaatar (Mongolia) April 24 (Agencies) : Deobarnü 1buba World Olympic Qualifying asayamong nung India nunger ‘freestyle’ melangteper Sandeep Tomar-i tebur seret 57 telemsa nung bronze medal anguba ajanga Olympic nung melangteptsü jenjang ngutetogo.
Yogeshwar Dutt (65kg freestyle), Narsingh Yadav (74kg freestyle), aser Hardeep Singh (Greco-Roman 98kg) nunger sülen arishi küm 25 tain, Sandeep ya India nunger nisung pezübuba taküm agitsü aliba Olympics nung shilem agitsü jenjang angusang kümogo.
“Ni iba jenjang ngutetba atema kong ang mayu pelar aser kanga merangba süngjang ni aonger ama ni bilemer. Ni final metongtetba atema khen nemjema bilem, ajisüaka iba tamakok kü shisatsü nungi tekaraba nung ageintsü kanga nüngdaka liasü,” ta Tomar-i ashi.
“Tanü ni bilemba ama arakzüa melangtepogo aser joko Olympic dak rangloker meranga inyaktsüba dang anünga lir,” ta pai ashi.
Iba Qualifying asayamong nung temaba jenjang asem tashi nung takok angurtema ang Olympic atema shimteter. Anungji bronze medal angubaji Sadeep atema teperi masü asü kechiba süra pai ano bronze angur tangar kaji akok nungdang tasembuba jenjangji ngutettsa mapang jagi bentsür aru.
Bronze atema melangtepdang Sandeepi 11-0 agi Ukrain nunger melangteper Andriy Yatsenko madak kanga tetsüngda ittepa takok angu.
Pai Turkey nunger Sezar Akgul 11-0 agi aser Kyrgyzstan nungi Ulukbek Zholdoshbekov madak 4-1 ta takok anguba sülen semi final atong.