Melbourne-i 2023 tashi F1 ayongtsü tezüngzüktep agir

Melbourne, September 15 (Agencies): Melbourne-i Australian Formula One (F1) Grand Prix tetoktepba 2023 tashi ayongtsü tezüngzüktep agiba osang ka Victoria state sorkari metetdaktsüogo.

“Melbourne-i F1 tetoktepba 2020 tashi ayongtsü tezüngzüktep yaküm 2014 küm agi saka kasaji küm 3 agi atsünglangshia 2023 küm tashi ayongtsü tezüngzüktep tan agishir lir,” ta Victoria Ato Kilonser, Daniel Andrews-i metetdaktsü.

Melbourne-i 1996 küm nungi tenzüka Australian Grand Prix (GP) tetoktepba ayongba osang bushiteta lir.

“Europe den mapang balala aliba ajanga Europe nung tentetba television sentongtem nung iba tetoktepba mapang shitak nung mesayutetba yong Australian GP-i sen tajangzük tajemba bener arutsür,” ta F1 nung chief executive, Bernie Ecclestone-ia metetdakja lir.

Aji oda, tanüngba F1 ayongdak ama sensotsü tajangzük bener marutsü aka, Melbourne-i kümshi F1 tetoktepba tenzükdak jenjang tanü tashi ngua aruba osang bushiteta lir.