Melbourne nung gari agi senzüsembonger dak atsük; Driver pua lir

Melbourne, December 21 (Agencies): Nisung kati Melbourne nung senzüsembonger dak taochi melie atsüksang ya temesepba mozü achir aser tekolok meshidak, saka kiralongraba mapa bo masü, ta police temi ashi.
Iba lendong agütsüsang ya Australia nunger senso ka lir aser Afghanistan nungi jakzükba, aser pa ya police temi puogo.
Yimti tiyong nung kanga mazüngi aliba lemjem, Flinders Street nung arishi küm 32 tain nisungba yagi senzüsembonger dak atsük, ta Victoria Police ajanga ashi.
Iba lendong nung nisung 14 yiru aser yirur alirtem rongnungi nisung kar bo mekümzüktettsü akok, ta osang ajanga ashir.
Iba lendong atalokba tangoker arishi küm 24 tain tebur ka densema pua lir, aser pa kabu nung kotari aika liasü, ta police-i shisem.
“Iba lendong den pa sendaktepa mali, saka pai bushisüngdangba nung police den yariteper,” ta police ajangasa ashi.
Lendong agütsüsang ya ‘off-duty’ nung aliba police tanishir kati apu aser iba gari nung pa kisüng liasü.
Iba nisung apuba mapang police tanishir ya teka aser tapubang yiru, aser pa mozüki nung anepaluba mapang lir.
Gari anisang ya police temi tanükba agüja mozüki-i anir ao.
SUV gari sentsü temesüng ka nung iba nisung ya mener 16:30 (05:30 GMT) ako nung senzüsembonger dak atsük.
“Senzüsembonger aika aliba tesemi gari ya kanga kera ao. Iba gari anentsü merangba majitet,” ta tenük kuli angur kati ashi.
“Nisung pongu nungi ti tashi ali nung mejanga aliba ni angu aser nisung aika adenshia parnok yari. Iba sülen minute ka majungdang police aru,” ta pai-sa shisem.
Arishi küm asem shi tanur ka iba lendong nung mejungi tekolak yirua lir, ta Victoria Ambulance ajanga sangdong ka nung ashi.
Iba lendong aija, Australia Ato Kelonser Malcolm Turnbull-i Twitter nung zülutsü aser iba ken o bushisüngdang tenzükogo, ta ashi.
Australia sorkar nung opposition lenir, Bill Shorten-ia iba lendong indang Twitter nung lemsatep aser emergency service tenüng asang.
January ita Bourke Street nung nisung kati gari ka anir arua nisung trok tsükset. Iba sülen yimti ketdangsertemi Flinders Street densema tesem balala nung concrete blocks inoka lir.