Melungtet teloktemi nükjidong ka ser inyaktsüla: Angh Acharya

Sendenyu, Dec. 17 (TYO): Tanü Nagaland Angh, P.B. Acharya-i, melungtet teloktem/NGOs aser lokti tentettemi nükjidong ka ser inyaktsüla aser state nung yimjung bener arutsü atema longjema alitsüla, ta ayongzük.
Kohima district kübok Tseminyu sub-division, Sendenyu nung 38buba Rengma Students’ Union (RSU) General Conference nung ‘Envision, Enlighten & Empower’ omen nung jembidang Angh-i, state nung tesünep melira terenlokji tetezü maka, ta ashi.
Paisa state nüburtem dang tangatetba shisatsü melenshir tejakleni aotsüla, ta ashi.
Acharya-i, “State tajung ka akumtsüsa asenok dak tashi lir,” ta ashi.
Paisa, taruba küm 2016 ya tayongzükba tulu ka lir aser state tashi itta akumba den azükarutsü atema state nüburtem atema maongka tajung lir, ta ashi.
RSU-i Tseminyu Sub Division nung sorkar college ka lapoktsü temepishiba agüja aliba dak sentakba nung Angh-i iba maparen atema inyaktsü ta ashi.
Pai, “Ni school education minister ajurutsü aser sangküm nungi Tseminyu Sub Division nung sorkar college tenzüktsü atema inyaktsü,” ta ashi.
“Kaketshir tentettem ya lokti nung tashi taittiba tongshi lir,” ta pai ashi.
Kaketshirtemji lokti nung milen amertem asütsüla ta shia Angh-i kaketshirtem dang peipei tesem nung tesayur temelen inyakba mita reprangtsüla, ta ashi.
Iba sentong nungsa PWD (Housing) Parliamentary Secy., Er. Levi Rengma-i, kaketshirtemi shisatsü ngur kasaji maongka mangur aser sensakertem dang sayutsüla, ta ashi.
NSF Tir, Subenthang Kithan-ia, NSF nung tashi tait telen rongnung RSU densema lir ta shia RSU-i jenjang tajungtiba arishitsüla, ta ayongzük.
Paisa RSU dang nüburtem aser kaketshirtem lenla ajaklen terenlok angutsü atema inyaktsüla, ta shisem.
Tanep RSU Tir, Er. Meshenlo Kath-i Tir o jembi aser Chogin Range Students’ Union Tir, Shwenlozii Thongseb-i lokti pelaa agizük.
December 18 nü “Social media impact on our youth” onük nung talk show, “Status of Rengmas in Nagaland,” onük nung o lemtep, kenten toktepba aser Union Assembly agitsü.