Meluri nung Pawan Hans helicopter ka tsüok; 6 yiru

November 24, 2015 nü Meluri Helipad nung Pawan Hans helicopter ka tsüokba sülen idakji alirtemi mi enseptsü yaritepdang agiba noksa angur.

Kohima/New Delhi, November (Agencies) : Mongulbarnü Phek district kübok Meluri Helipad nung Pawan Hans helicopter ka tsüok saka tia ka iba lendong nung nisung asütsüsabo timtem majuru.
Union Ministry of Home Affairs (Disaster Management Wing) nung Joint Secretary kati anir disaster management telok ka iba helicopter nung mena liasü.
Parnok tanep 7:00 ako meta Kohima Helipad nungi apusoa ao aser Meluri atongba sülen timtem kar ajurua tayimtsüji tsüok, ta Nagaland State Disaster Management Authority ketdangser kati ashi.
Iba lendong nung National Disaster Management nungi züngsem ana aser State Disaster Management Authority nungia züngsem ana den pilot yiru aser parnok ajak IAF Imphal, Manipur telok kati Naga Hospital, Kohima-i anir arua anepaludar.
Nagaland kübok Meluri sub-division nung lendong atalokba osang metetpelatsü atema National Disaster Management Team ka tonga aruogo.
“Helicopter ji Meluri, Nagaland nung anenzüktsüba lia lendong atalok. Helipad nung auyi kanga liasü aser ibaji ajanga pilot-i tanendak junga mongui aküm. Helicopter ji ali nung kanga mejungi anen saka passenger aser pilot ajak lendong nungi jenbuogo” ta Pawan Hans Limited (PHL) otongdar, M S Boora-i osangbener dang ashi.
Jammu kübok Katra nung helicopter ka tsüoka Mata Vaishno Devi temeshi aini aoer 6 den tetsür pilot ka asüba tatalokba sülen anogo ka lir tanü iba lendong atalokogo.
PHHL helicopter lendong tulu ajurubaji tan agi tasembenbuba asütsü. Tan ita tetenzüklen (November 4 nü) Pawan Hans Dauphin helicopter ka Mumbai anasa Arabian Sea nung tsüok aser iba lendong nung pilot anaprong asü. Ano taküm August ita nunga kasa company indang Dauphin helicopter ka Arunachal Pradesh nung tsüok aser iba lendong nunga pilot ana den tamener nisung 3 tashi tsükset.
Item lendong atalokaka DGCA-i tanü tashi Pawan Hans Limited (PHL) indang inyakyim reprangshimtsü atema telemtetba magi lir.