Memejangba Tsüngrem

Alima meimchirtem yabo mapang shia anisüngzüktsü nüngdaker, kodang anisüngzük ta südir mapa meinyaki ayonga kazüba dang masü saka tashi tasen angutsü atema mapang peria mejangtsübaji kanga tenüngdaktsü. Asenokbo konung ayip majang nunga süng tasüngji temang anema malir mesüra pei mapa shitak meinyakteter aser anogo piyong temangji lulalular dang alir. Aji kechiba? Kechiaser meimchirji tabensaba taküm masü aser tashi maitba agi sünga lir, anungji tashi tasen angutsü atemaji shitak mejangtsüla. Ken shidi süra, nisung asoshi mejangba ya asenoki amshiba mobile phone battery charge asüba amato lir. Cell phone ya anogo ishika battery charge masü nung süadoker, yamaji ali meimchir takümjia lir.  Kodang mejangba mesüra amua aoba indang jembidir, mejangerbo asenoki kecha mangur, mangashir, memeteter. Mejanga alidangbo asenok meketa kechisa ataloker aser inyaker kecha memeteti süngmanga aor. Aji oda süaka ajak takoksang aser tulusang asen Tsüngrem yabo kodanga memejanger. Mapang ajak nung Tsüngrem asenok den lir. Pabo teti kürang küranga dang lir. Ashiko asenoki inyakba, jembiba aser bilemba ajakbo Pai ngua malitsü mesüra  mangashitsü  ta asenoki bilemtsüa akok. Saka yamaji kodanga masü, kechiaser anepdang, anüngdang mesüra  tiprong mapang ajak nung Tsüngrem tenükbo saaka lir aser asenoki inyakba aser bilemba ajak Pai sadaka ngudar. Asenok alima nung liaka, tzüyim telungi luaka mesüra anüng tom nung tua yimzüaka Pai asenok ngudar. Asenoki inyakba mapajibo yutsür asen mulungjang taroktiba nung kechi bilemer iba tashiji Tsüngremi ateta angur. Tenüngsang ken züluri ashir – “Ajiang shibai Israel anüker, amua maotsü mesüra memejangtsü”. T. Ken 121:4. Tsüngrembo memejanger asünung mapang ajak nung asen taküm aser mapatem Pai ngudar ta asenoki mamadoktsüla. Asen mulungjang nung iba tangatetbaji lira iba o jagi asen mulung nung teti jembitsü aser temenen lenmang nung kenyongi tetsüng majemoktsü aser iba jagi Pai agizüktettsüsa asen takümji lia atatsü. Kodang asen takümji Pa tsüngdang tagizüktettsüsa südir ibaji Tsüngrem den yimjung nung aliba. Pa den yimjung nung lira  mapang ajak nung asenoki asen tebilemtsütem kecha marendaki Tsüngrem dang shitettsü aser itemji Pai angashitsü. Saka asen takümji Pai magizüktettsüsa dang lia atara komaka sarasademaka ibaji yongmen yin takoshiba ola den saku dang asütsü. Tsüngrem o-i ashir – “Temeshi nisungi ayimten dang Kibubai angashir, aser parnok timtem ajak nung parnok kümzüker”. T. Ken. 34:17. Ya asayaba o ka masü saka asen tebu Tsüngrem tenangzükba lir. Tanüa iba kasa tenangzükba ya asenok den lir. Iba lima nung asenok lia aodang timtem tia balala ajurutsü. Koda masüba timtem, shisabulu aser mulung zürep tia nung alidang asenoki ayimtenba olaji memejangba Tsüngremi angashitsüsa asen taküm alitsübaji ajak dang tongtibangtiba. Asenok tetsüng külen temenen tzübu nung ajemoka yur mesüra teka külen agi temenen mapa inyaka teka külen jagi Pa den salemtsü ora, Pai kodanga asenok olaji mangashitsü. Anungji temenen mapatem nungi pilar Pai tuyuba lenmang nung dang jajatsüla. Aji süra mapang ajak nung  Paji asen teyarir aser asen jenokdak sütettsü. Laishibai ashir – “Tamajung nungi pilaang aser tajung inyakang; yimjung bushiang aser aji arishiang. Kibuba tenük temeshi nisung tsütsü lir, aser parnoki ayimtenba nung pa tenarong lapoka lir. T. Ken 34: 14-15. Asenoki temenen nungi pilaa lira mapang ajak nung Paji asen jenokdak aser tekümzüker asütsü. Nisung aikati Tsüngrem bushir saka mangur, kechiba süra parnoki taküm meshiteta malir, iba jagi Tsüngremji mangur. Kodanga memejangba tebu Tsüngremi asen ola angashitsüsa alitsübaji asenok dak dang keta lir. Aji oda,  asenok Tsüngrem den tesendaktep junga ayutsübaji mapa ajak dang tongtibangtiba asütsü.